گوہاٹی :
آسام کے کریم گنج میں بھارتیہ جنتا پارٹی (بی جے پی) کے امیدوار اور موجودہ ایم ایل اے کرشن ندو پال کی گاڑی سے ای وی ایم مشین ملنے کے بعد ہنگامہ برپا ہوگیا ہے۔ الیکشن کمیشن نے اس پر سخت ایکشن لیتے ہوئے متعلقہ بوتھ پر ہونے والے انتخابات کو منسوخ کردیا ہے۔ صرف یہی نہیں کمیشن نے چار اہلکاروں کو بھی معطل کردیا ہے۔
آسام کے راتاباری میں پولنگ اسٹیشن نمبر 179 پر پولنگ منسوخ کردی گئی ہے اور دوبارہ پولنگ ہوگی۔ الیکشن کمیشن نے اس معاملے سے متعلق مقدمہ درج کیا ہے اور اس معاملے کی تحقیقات کا بھی حکم دیا ہے۔ الیکشن کمیشن نے ڈسٹرکٹ الیکشن آفیسر سے تفصیلی رپورٹ طلب کرلی ہے۔ سفید رنگ کی اس بولیرو کار میں ای وی ایم رکھنے کی ویڈیو سوشل میڈیا پر شدید وائرل ہو رہی ہے۔ کانگریس کے کئی رہنماؤں نے اس پر سخت کارروائی کی مانگ کی تھی۔
تفصیلات کے مطابق یہ کار آسام کی پتھرکنڈی اسمبلی سیٹ کے بی جے پی امیدوار کرشن ندو پال کی ہے۔ سفید رنگ کی اس بولیرو کار کا نمبر AS10 B 0022 ہے اور اس میں ای وی ایم رکھی ہوئی ہے۔ آسام پردیش کانگریس کے صدر رپن بورا نے ای وی ایم ملنے کے واقعہ پر الیکشن کمیشن سے اس معاملے میں فوراً کارروائی کی مانگ کی تھی ۔ اس کے علاوہ کانگریس کی جنرل سکریٹری پرینکا گاندھی نے بھی ٹوئٹ کیا تھا اور الیکشن کمیشن سے سخت کارروائی کی مانگ تھی ۔
پرینکا گاندھی نے ٹوئٹ کیا اور لکھا ، ’جب بھی نجی گاڑیوں میں ای وی ایم لےجانے کی ویڈیوز سامنے آتی ہیں ، ان میں کچھ چیزیں عام ہیں۔ نجی گاڑیاں بی جے پی امیدواروں اور ان کے اتحادیوں کی ہوتی ہیں۔ ویڈیو کو واقعہ کے طور پر بتا کر خارج کردیا جاتا ہے۔ بی جے پی اپنی ویڈیو کا استعمال میڈیا سسٹم کے ذریعہ الزام لگانے کے لئے کرتی ہے۔ حقیقت یہ ہے کہ اس طرح کے کئی معاملے سامنے آرہے ہیں ، لیکن ان کے بارے میں کچھ نہیں کیا جارہا ہے۔
کانگریس کی جنرل سکریٹری نے ایک اور ٹوئٹ میں مزید لکھا ،’الیکشن کمیشن کو ان شکایات پر فیصلہ کن انداز میں کارروائی کرنے اور ای وی ایم سے متعلق امور کا ازسر نو جائزہ لینے کی ضرورت ہے۔ تمام قومی جماعتوں کو ان معاملات پر توجہ دینی چاہئے۔ پرینکا نے اس ویڈیو کو بھی شیئر کیا ہے جو اس کے ساتھ وائرل ہو رہی ہے۔
واضح رہے کہ جمعرات کے روز آسام کی 39 نشستوں پر ووٹنگ ہوئی۔اس دوران 73.45 لاکھ ووٹرز میں سے 74.69 فیصد نے اپنے حق رائے دہی کا استعمال کیا۔ ریاست کی 39 سیٹوں میں سے جہاں 26 خواتین سمیت 345 امیدوار میدان میں ہیں۔