لکھنؤ :(ایجنسی)
بی جے پی نے ہفتہ کو اتر پردیش اسمبلی انتخابات کے لیے 107 امیدواروں کے ناموں کی فہرست جاری کی۔ اس الیکشن میں یوگی آدتیہ ناتھ گورکھپور شہر سے ،جبکہ نائب وزیر اعلیٰ کیشو پرساد موریہ کو کوشامبی کی سراتھو سیٹ سے انتخابی میدان میں اتارا ہے۔ بی جے پی کی مرکزی انتخابی کمیٹی نے 105 سیٹوں پر امیدواروں کے ناموں کا اعلان کردیا ہے۔ خاص بات یہ ہے کہ 20 اراکین اسمبلی کا ٹکٹ کاٹ دیا گیا ہے۔ بی جے پی کے اس قدم کو اقتدار مخالف لہر کے طور پر دیکھا جا رہا ہے۔
واضح رہے کہ بی جے پی نے پہلے مرحلے کی 58 سیٹوں میں سے 57 سیٹوں پر اور دوسرے مرحلے کی 55 سیٹوں میں سے 48 سیٹوں پر امیدواروں کا اعلان کیا ہے۔ مرکزی وزیر دھرمیندر پردھان نے کہا کہ گزشتہ پانچ سال میں غنڈہ راج پر یوگی حکومت نے نکیل کسا ہے۔ یوپی کو غنڈہ راج اور بدعنوانی سے آزادی دلائی ہے۔ یوپی میں ایئرپورٹ بن رہے ہیں، میڈیکل کالج بن رہے ہیں۔ انہوں نے کہا کہ یوپی انتخابات میں بی جے پی 300 سے زیادہ سیٹوں سے الیکشن جیتے گی۔
بی جے پی امیدواروں کی فہرست جاری کرتے ہوئے مرکزی وزیر دھرمیندر پردھان نے کہا کہ 107 امیدواروں کے ناموں کا اعلان کیا گیا ہے۔ 83 موجودہ ایم ایل اے کو دوبارہ ٹکٹ دیا گیا ہے۔ 24 نئے امیدوار اتارے گئے ہیں، جن میں نوجوانوں، خواتین اور سماج میں اچھے کام کرنے والے افراد کو شامل کیا گیا ہے۔
گوتم بدھ نگر میں تینوں سابق ایم ایل اے کو ٹکٹ
بی جے پی کے فائر برانڈ لیڈر سنگیت سوم سردھنا سیٹ سے الیکشن لڑیں گے۔وہیں گوتم بدھ نگر کی بات کریں تو یہاں سے تینوں موجودہ ایم ایل اے کو ٹکٹ دیا گیا ہے۔ پنکج سنگھ کو نوئیڈا سے دوبارہ میدان میں اتارا گیا ہے۔ دادری سے تیج پال سنگھ نگر اور جیور سے دھیریندر سنگھ دوبارہ الیکشن لڑیں گے۔ غازی آباد کی لونی سیٹ سے نند کشور گوجر، صاحب آباد سے سنیل شرما کو دوبارہ موقع دیا گیا ہے۔
اکھلیش یادو نے یوگی کو سادھا نشانہ
بی جے پی کی فہرست کے اعلان کے فوراً بعد ایس پی سربراہ اکھلیش یادو نے پریس کانفرنس کرکے یوگی آدتیہ ناتھ کو نشانہ بنایا۔ انہوں نے کہا، پہلے کوئی کہتا تھا کہ یوگی ایودھیا سے الیکشن لڑیں گے۔ پریاگ راج سے الیکشن لڑیں گے، متھرا سے الیکشن لڑیں گے لیکن بی جے پی نے انہیں ان کے گھر واپس بھیج دیا ہے۔ انہوں نے کہا کہ اس بار انتخابات میں بی جے پی کا صفایا ہو جائے گا۔
بتا دیں کہ اتر پردیش میں سات مرحلوں میں اسمبلی انتخابات ہونے ہیں۔ انتخابات کا پہلا مرحلہ 10 فروری اور دوسرا مرحلہ 14 فروری کو ہوگا۔ ساتویں اور آخری مرحلے کی پولنگ 7 مارچ کو ہوگی۔ اس کے بعد نتائج کا اعلان 10 مارچ کو کیا جائے گا۔