نئ دہلی :خصوصی تحقیقاتی ٹیم (ایس آئ ٹی) نے گجرات فسادات کیس میں چارج شیٹ داخل کی ہے۔ یہ چارج شیٹ معروف سماجی کارکن تیستا سیتلواڑ، ریٹائرڈ ڈی جی پی آر بی سری کمار اور سابق آئی پی ایس افسر سنجیو بھٹ کے خلاف دائر کی گئی ہے۔ یہ الزام لگایا گیا ہے کہ ان تینوں نے گجرات کے اس وقت کے وزیر اعلیٰ نریندر مودی کے سیاسی کیریئر کو بدنام کرنے اور انہیں مبینہ طور پرموت کی سزا دلانے کی سازش رچی تھی۔
‘جن ستہ آن لاین’ نے اپنی رپورٹ میں یہ دعویٰ کیا ہے ڈی آئی جی دیپن بھدرن ایس آئی ٹی کے سربراہ ہیں اور انسداد دہشت گردی اسکواڈ (اے ٹی ایس) کا حصہ ہیں۔ انہوں نے ‘انڈین ایکسپریس’ کو تصدیق کی کہ منگل کو احمد آباد میں ایڈیشنل چیف میٹروپولیٹن مجسٹریٹ کی عدالت میں چارج شیٹ داخل کی گئی۔ 100 صفحات کی چارج شیٹ میں تینوں پر فرضی ثبوت گھڑنے اور پی ایم مودی کو بدنام کرنے کی کوشش کرنے کا الزام ہے۔
اس کے علاوہ کانگریس کے سابق رکن اسمبلی احسن جعفری کی اہلیہ ذکیہ جعفری کے نام سے بھی درخواستیں دائر کی گئیں ۔ واضح ہو تینوں ملزمان کے خلاف آئی پی سی کی دفعہ 120B، 468، 469، 471، 194، 211 اور 218 کے تحت مقدمہ درج کیا گیا تھا۔ جون کے آخری ہفتے میں گرفتار کیا گیا تھا، سیتلواڑ کو 2 ستمبر کو سپریم کورٹ کے حکم کے بعد عبوری ضمانت پر رہا کیا گیا تھا۔ سری کمار اس وقت جیل میں ہیں، بھٹ پالن پور جیل میں ہیں، جہاں وہ موت کے مقدمے میں عمر قید کی سزا کاٹ رہے ہیں۔