بھوپال :(پریس ریلیز)
گزشتہ روز جمعہ بعد نماز عشاءجامعہ اسلامیہ عربیہ مسجد ترجمہ والی بھوپال میں زیر صدارت امیر شریعت،مفتی اعظم، مولانا مفتی محمد احمد خان ،جمعیۃ علماءکی ایک اہم میٹنگ منعقدہوئی۔
جس میں صدر محترم نے نوپور شرما اور نوین جندل کی ابھی تک گرفتاری نہ ہونے پر بڑے افسوس کا اظہار کیا اور فرمایا کہ ہمارے نبی محمد مصطفی صلی اللہ علیہ وسلم ہمارے لئے ہماری جانوں سے بھی زیادہ پیارے وعزیز ہیں، اس لیے صرف دونوں گستاخان رسول کو پارٹی سے برخاست کر دینے سے مسلمانوں کا غصّہ ختم نہیں ہو جائے گا، بلکہ ان دونوں کو گرفتار کر سخت سے سخت سزا دی جائے،جس کے لئے جمعیۃ علماء مدھیہ پردیش کے تمام ضلعی،تحصیلی اوردیہاتی جمعیۃ کے صدور و نظماء اپنے اپنے علاقہ میں پر امن طریقہ سے، اپنی ناراضگی کا اظہار کرتے ہوئے کلکٹر ،ایس پی کومیمورنڈم سونپ کر نوپور شرما اور نوین جندل کی گرفتاری کا مطالبہ کریں۔ اور حکومت ہند سے مطالبہ کیا کہ جلد از جلد ان دونوں کو گرفتار کیا جائے تاکہ مستقبل میں کوئی اس طرح سے ناموس رسالت پر حملہ نہ کر سکے۔
اس موقع پر مولانا محمد اسحاق قاسمی،جنرل سکریٹری جمعیۃ علماء مدھیہ پردیش ، حاجی عبد المجیدسالار خان ناظم مالیات جمعیۃ علماء مدھیہ پردیش، مفتی مجیب الدین صدر جمعیہ علماء ضلع بھوپال، مولانا محمد عابد مظاہری،حاجی لئیق ، قاضی اکرام ، محمد کاشف، مفتی شکیل احمد واجدی، محمد عثمان بھائی، محمد ریحان ، حافظ سید قمر علی ، محمد برھان ، مفتی جنید، حافظ نجیب، مفتی موسی، محمد مجاہد،اور دیگر حضرات موجود رہے۔