بھوپال :(ایجنسی)
بھوپال سے بی جے پی کی رکن پارلیمنٹ سادھوی پرگیہ سنگھ ٹھاکر کو ماضی میں داؤد گینگ نے جان سے مارنے کی دھمکی دی تھی۔ جس کے بعد ٹی ٹی نگر پولیس اسٹیشن میں ایف آئی آر درج کرائی گئی۔ اب اس معاملے میں مرچی بابا نے بیان دیتے ہوئے کہا کہ جن کے ہاتھ خون سے رنگے ہیں ان کو کون مارے گا، مرچی بابا یہیں نہیں رکے، انہوں نے سادھوی پرگیہ کو پاکھنڈی تک بتا دیا ۔
بتا دیں کہ جمعہ کی رات (17 جون) کو ایم پی سادھوی پرگیہ کو دھمکی دی گئی تھی۔ جس کے بعد اس سلسلے میں شکایت درج کرائی گئی تھی۔ ایسے میں اپنے بیانات سے بحث میں رہنے والے مرچی بابا نے سادھوی پرگیہ کو نشانہ بناتے ہوئے کہا کہ سب سے بڑی بات یہ ہے کہ پرگیہ سنگھ ٹھاکر کسی اکھاڑہ سے وابستہ نہیں ہیں، اس لیے اسے سادھوی کا خطاب نہیں لگانا چاہیے۔
مرچی بابا نے کہا کہ ان کی پارٹی کے رہنما ہر وقت لوگوں کو پاکستان بھیجتے رہتے ہیں۔ اگر پرگیہ سنگھ ٹھاکر اس ملک میں اتنا خوف محسوس کر رہی ہیں تو پاکستان کیوں نہیں چلی جاتیں۔ سوشل میڈیا پر وائرل ایک ویڈیو میں مرچی بابا کچھ صحافیوں سے بات کرتے ہوئے نظر آ رہے ہیں۔ جس میں انہوں نے سادھوی پرگیہ کو دھمکیاں ملنے کے سوال پر بھی طنز کیا ہے۔
سادھوی پرگیہ دھمکی کیس پر مرچی بابا نے کہا ’’جن کے ہاتھ خون سے رنگے ہیں ان کو کون مارے گا،‘ ساتھ ہی سوال اٹھایا کہ سادھوی پرگیہ پاکھنڈ کر رہی ہے۔ سادھوی پرگیہ کو ان کے اپنے ہی آدمیوں نے دھمکی دی ہوگی، کیونکہ دھمکی کی ویڈیو بھی بن گئی اور آدمی بھی نہیں پکڑاگیا۔ میں تو پہلے سے ہی کہتا چلا آرہاہوں کہ یہ ماسٹر مائنڈ ہیں۔
سادھوی پرگیہ کو نشانہ بناتے ہوئے مرچی بابا یہیں نہیں رکے، انہوں نے کہا کہ میں خود پنچایتی نرنجنی اکھاڑہ کا مہامنڈلیشور ہوں، لیکن پرگیہ سنگھ ٹھاکر کس اکھاڑہ سے وابستہ ہیں؟ ایسے میں اس سادھوی کو لگانا بند کرو اور منافقت نہ پھیلاؤ۔ مرچی بابا نے سادھوی پرگیہ کی وہیل چیئر پر بھی طنز کرتے ہوئے کہا کہ جب بھی عدالت میں تاریخ آتی ہے، وہ وہیل چیئر پر چلی جاتی ہیں۔ باقی وقت آپ فٹ بال کھیلتے نظر آتے ہیں، یہ پاکھنڈ نہیں تو اور کیا ہے؟