نئی دہلی:
جیسا کہ توقع تھی آل انڈیا مسلم پرسنل لاء بورڈ کے صدر مولانا محمد رابع حسنی ندوی نے معروف فقیہہ مولانا خالد سیف اللہ رحمانی کو جو فی الوقت سکریٹری بورڈ ہیں اور گلف میں کورونا کاعلاج کرارہے ہیں ،کارگزار جنرل سکریٹری نامزد کردیا ہے۔ یہ عہدہ مولانا سید محمد ولی رحمانی کے انتقال سے خالی ہوگیا تھا۔ مولانا رابع صاحب نے اس سلسلے میں ایک بیان جاری کرکے یہ اطلاع دی۔ انہوں نے اپنے بیان میں کہاکہ ضرورت اور کام کے تقاضوں کے تحت قائم مقام جنرل سکریٹری کی فوری ضرورت ہے۔ چند ماہ میں بورڈ کا انتخابی جلسہ ہونے والا ہے۔ جنرل سکریٹری کااصل انتخاب اسی جلسہ میں ہوگا۔ عارضی طور پر وہ شریعت وملت کے کاموں کے لیے معروف مولانا خالد سیف اللہ رحمانی کو اس عہد پر نامزد کررہے ہیں۔انہوں نے بورڈ کے دفتر کو ہدایت دی ہے کہ وہ ان سے رابطہ رکھے۔ حسب معمول ان کے مشورے سے کام کرے۔ انہوں نے اپنے بیان میں مولاناولی رحمانی کو خراج عقیدت پیش کرتے ہوئے کہاکہ ان کی وفات کو ہم سب بڑا سانحہ محسوس کرتے ہیں۔ اللہ اس خسارے کا نعم البدل عطا کرے۔
واضح رہے کہ یہ بات قرین قیاس تھی کہ مولانا خالد سیف اللہ رحمانی کو ہی جنرل سکریٹری بنایا جائے گا۔ عام خیال ہے کہ ان کو جنرل سکریٹری کے عہدے پر منتخب کرلیا جائے گا۔ وہ متعدل مزاج شخصیت ہیں اور سب کے لیے قابل قبول ہیں۔