نئی دہلی:
کورونا کے بڑھتے معاملے اوربد سے بدتر ہورہے حالات کے درمیان بی جے پی لیڈر اور راجیہ سبھا ممبر سبرا منیم سوامی نے کہاکہ کورونا سے پوری لڑائی لڑنے کا ذمہ وزیر اعظم مودی کو نتن گڈکری کو سونپ دینا چاہئے۔ انہوں نے وزیر اعظم دفتر پر انگلی اٹھاتے ہوئے کہاکہ پی ایم او پر صرف منحصر رہنے سے کام نہیں چلے گا۔
اپنے ٹویٹ میں انہوں نے کہا کہ بھارت کورونا وائرس کی وبا سے بچ جائے گا جیسے اس نے اسلامک حملہ آوروں اور برطانوی سامراجیوں سے بچا تھا۔ ہم ایک اور لہر کا سامنا کرسکتے ہیں جو بچوں کے لیے خطرناک ہو سکتی ہے ۔ جب تک کہ سخت احتیاط نہیں برتی جاتی ۔ اس لئے مودی کو گڈکری کو اس جنگ کی کمان سونپنی چاہئے ۔ پی ایم او پر بھروسہ کرنا بیکار ہے۔
سوامی نے ایک ٹویٹر صارف کا جواب دیتے ہوئے راج ناتھ سنگھ کا بھی ذکر کیا۔ انہوں نے کہا ، ’راج ناتھ بہت قابل وزیر بھی ہیں، لیکن وہ پہلے ہی دفاع کی ذمہ داری اٹھائے ہوئے ہیں ۔ کابینہ میں نمبر 2 رینک پر ہیں۔‘
وہیں جب ایک صارف نے ٹویٹر پر وزیر صحت ہرش وردھن کو ہٹانے کی بات کہی تو سوامی نے ڈاکٹر ہرش وردھن کا بچا ؤ کرتے ہوئے جواب دیا ۔انہوں نے کہاکہ نہیں نہیں ہرش وردھن کو فری ہینڈ کی اجازت نہیں ہے ، وہ اپنے اختیارات کا دعویٰ کرنے کے لیے بہت شائستہ ہیں۔ گڈکری کے ساتھ وہ بہتر کریں گے۔
سبرامنیم سوامی مسلسل سرکار کی تنقید کرتے آئے ہیں، اس سے پہلے انہوں نے پیر کو ٹویٹ کرتے ہوئے کہاتھاکہ ’ سرکار کو یہ کہنا بند کردینا چاہئے کہ کتنا آکسیجن ہمارے پاس دستیاب ہے۔ بلکہ یہ کہنا چاہئے کہ کتنی ہم نے سپلائی کی ہے اور کن کن اسپتالوںمیں اسے بھیجی گئی ہے۔ ‘سوامی نے کہاکہ گزشتہ سال اکتوبر میں ، اسٹینڈنگ کمیٹی فار ہیلتھ نے یہ اتنباہ دیا تھاکہ آکسیجن سلنڈر اور سپلائی کی بھاری قلت ہے ۔ سرکار نے اس کی کوئی پرواہ نہیں کی۔