لکھنؤ (ایجنسی)
اتر پردیش اسمبلی انتخابات میں سیاسی جماعتوں کے درمیان شہ -مات کا کھیل جاری ہے۔ سہیل دیو بھارتیہ سماج پارٹی کے صدر اوم پرکاش راج بھر نے اسد الدین اویسی کے ساتھ مل کر بھاگیداری سنکلپ مورچہ بنایا ۔ ریاست میں گھوم کر دونوں لیڈروں نے ریلیاں بھی کیں۔ بی جے پی کے ساتھ دوستی کا ہاتھ بھی بڑھایا،لیکن اوم پرکاش راج بھر نے آخر میں ایس پی سے اتحاد طے کرلیا ہے ۔ راج بھر نے اس بات کو خود ہی عام کیا۔
سہیل دیو بھارتیہ سماج پارٹی کے قومی صدر اوم پرکاش راج بھر نے بدھ کو ایس پی سربراہ اکھلیش یادو سے ملاقات کی ہے۔ راج بھر نے ٹویٹ کرکے ایس پی کے ساتھ اتحاد کا اعلان کردیا ہے۔ انہوں نے سماج وادی پارٹی کے قومی صدر اکھلیش یادو کے ساتھ اپنی ملاقات کی ویڈیو بھی شیئر کی ہے۔
اوم پرکاش راج بھر نے ٹویٹ کیا کہ’اب کی بار ، بی جے پی صاف‘ سماج وادی پارٹی اور سہیل دیو بھارتیہ سماج پارٹی مل کر آئے ساتھ۔دلتوں ،پسماندہ ،اقلیتوں کے ساتھ تمام طبقات کو دھوکہ دینے والی بی جے پی کے دن ہیں بچے چار۔ سابق وزیر اعلیٰ اور ایس پی کے سپریمو اکھلیش یادو سے رسمی ملاقات کی۔
اوم پرکاش راج بھر کے ساتھ اکھلیش یادو کی ملاقات کےبعد سماج وادی پارٹی نے بھی آفیشیل نوئٹر ہینڈل پر ٹویٹ کر کہاکہ ’ محروم ، مظلوم ،پسماندہ ،دلتوں ،خواتین، کسانوں،نوجوانوں ہر کمزور طبقے کی لڑائی سماج وادی پارٹی اور سہیل دیو بھارتیہ سماج پارٹی مل کر لڑیں گے ۔ ایس پی اور ایس بی ایس پی آئے ساتھ،یوپی میں بی جے پی صاف۔‘
ایس پی کی جانب سے کہا گیا ہے کہ سہیل دیوبھارتیہ سماج پارٹی کے بانی اوم پرکاش راج بھر ہمیشہ غریبوں ، کسانوں ، مزدوروں ، دلتوں اور پسماندہ طبقات کے لیے لڑتے آئے ہیں۔ سہیل دیو بھارتیہ سماج پارٹی نے ہمیشہ سماجی انصاف کی بات کہی ہے ۔ چاہے پھر وہ آبادی و معاشی بنیادوں پر ریزرویشن ، سماجی انصاف کمیٹی کی رپورٹ لاگو کرنا، پرائمری اسکولوں میں تکنیکی تعلیم، گھریلو بجلی بل معاف، خواتین کو 50 فیصد ریزرویشن، غریبوں کو مفت علاج، کٹری اور مختصر صنعت سے بےروزگاروں کو روزگار، پرائمری اسکولوں سے پوسٹ گریجویشن تک مفت تعلیم، بلاامتیاز ملازمتیں، سماجی انصاف کمیٹی کی رپورٹ پر عملدرآمد ، مفت صحت تعلیم اور بجلی وغیرہ۔
واضح رہے کہ گزشتہ دنوں اوم پرکاش راج بھر نے پریس کانفرنس کر کے بی جے پی کے ساتھ اتحاد کے اشارے دئے تھے۔ انہوں نے کہا تھا کہ 27 اکتوبر کو اتحاد کااعلان ہوجائےگا۔ اس دوران بی جے پی کے ساتھ ان کی بات چیت بھی چل رہی تھی۔ لیکن اب انہوں نے اکھلیش یادو کے ساتھ جانےکا فیصلہ کرلیا ہے ۔ اسی تعلق سے راج بھر نے اکھلیش کے ساتھ مل کر اتحاد کی بات چیت کی، جس کے بعد دونوں کےدرمیان اتفاق بن گیا ہے ۔