نئی دہلی:
راشٹریہ لوک دل کے صدر اور سابق مرکزی وزیر چودھری اجیت سنگھ کا کورونا وائرس کے سبب جمعرات کی صبح انتقال ہوگیا۔ وہ 82 سال کے تھے۔
چودھری اجیت سنگھ کے بیٹے اور سابق رکن پارلیمنٹ جینت چودھری نے ایک ٹویٹ کر کے یہ اطلاع دی۔
چودھری اجیت سنگھ کورونا انفیکشن سے متاثر تھے ۔ انہیں 20 اپریل کوطبیعت بگڑنے پر اسپتال میں داخل کرایا گیا تھا۔ وہ ہریانہ میں گوروگرام کے ایک پرائیوٹ اسپتال کے آئی سی یو میں تھے ۔ سابق وزیر اعظم چودھری چرن سنگھ کے بیٹے اور مغربی اتر پردیش کے قد آورلیڈر چودھری اجیت سنگھ کسانوں کی آواز سمجھے جاتے تھے ۔
صدرجمہوریہ ونائب صدر جمہوریہ کا موت پراظہارافسوس
صدرجمہوریہ رام ناتھ کووند نے سابق مرکزی وزیر چودھری اجیت سنگھ کی موت پر گہرے رنج و غم کا اظہار کیا ہے۔مسٹر کووند نے جمعرات کے روز ٹویٹ کیا ’’ نیشنل لوک دل کے سربراہ اور سابق مرکزی وزیر چودھری اجیت سنگھ کی موت کی خبر سے دلبرداشتہ ہوں ۔ انہوں نے ہمیشہ کسانوں کے مفادات میں آواز اٹھائی‘‘۔انہوں نے مزید کہا ’’ایک عوامی نمائندے اور وزیر کی حیثیت سے انہوں نے ملکی سیاست پرانمٹ نقوش چھوڑے ہیں ۔ ان کے اہل خانہ اوربہی خواہوں سے میری تعزیت‘‘۔
نائب صدر جمہوریہ ایم وینکیا نائیڈو نے راشٹریہ لوک دل کے صدر اور سابق مرکزی وزیر چودھری اجیت سنگھ کے انتقال پر گہرے رنج و غم کا اظہار کیا ہے۔مسٹر نائیڈو نے جمعرات کو یہاں جاری ایک پیغام میں کہا کہ چودھری اجیت سنگھ کے زراعت اور کسانوں کی ترقی میں تعاون کو ہمیشہ یاد رکھا جائے گا۔مسٹر نائیڈو نے کہا ’’سابق مرکزی وزیر اور سینئر لیڈر چودھری اجیت سنگھ کے بے وقت موت کی خبر سن پر کافی رنجیدہ ہوں۔ زراعت اور کسانوں کی ترقی میں آپ کا تعاون ہمیشہ عزت سے یاد کیا جائے گا۔ دکھ کی اس گھڑی میں میری دعائیں اور تعزیت غمزدہ کنبے اور اتحادیوں کے ساتھ ہیں۔ میری عاجزانہ خراج عقیدت ‘‘۔
راہل-پرینکا نے موت پرافسوس ظاہر کیا
نئی دہلی :کانگریس کے سابق صدر راہل گاندھی اور پارٹی کی جنرل سکریٹری پرینکا گاندھی واڈرا نے راشٹریہ لوک دل کے لیڈر چودھری اجیت سنگھ کے انتقال پرافسوس کا اظہار کرتے ہوئےپسماندگان اور ان کے حامیوں سے تعزیت کا اظہار کیا۔مسٹر گاندھی نے ٹویٹ کیا ’’ راشٹریہ لوک دل کے سربراہ اجیت سنگھ جی کی بے وقت موت کی خبر افسوسناک ہے ۔ ان کے اہل خانہ اور حامیوں سے میری تعزیت‘‘ ۔ محترمہ واڈرا نے کہا ’’مقبول لیڈر، سابق مرکزی وزیر اور کسان دوست لیڈر چودھری اجیت سنگھ جی کے انتقال کی دلخراش خبر موصول ہوئی ۔ چودھری صاحب کی موت سے معاشرے اور سیاست کو ناقابل تلافی نقصان پہنچا ہے ۔ جینت اور آر ایل ڈی کے حامیوں کے تیئں میری گہری تعزیت ۔ ایشور چودھری صاحب کو ابدی سکون عطا کرے ‘‘ ۔راشٹریہ لوک دل کے صدر چودھری اجیت سنگھ کی کورونا سے موت