ممبئی :(ایجنسی)
ہر معاملے میں کھل کر اپنے خیالات کا اظہار کرنے والی بالی ووڈ اداکارہ کنگنا رناوت نے ایک بار پھر اپنے خیالات کا اظہار کیا ہے۔ بہت سے لوگ بھارتیہ جنتا پارٹی کی سابق قومی ترجمان نوپور شرما کی مخالفت کر رہے ہیں جنہوں نے پیغمبر اسلام کے بارے میں تبصرہ کیا تھا۔ ادھر بالی ووڈ اداکارہ کنگنا رناوت ان کی حمایت میں سامنے آگئی ہیں۔
کنگنا نے اپنی انسٹاگرام اسٹوری پر لکھا، ’’نوپور اپنی رائے رکھنے کی حقدار ہیں۔ میں دیکھ رہی ہوں ہر دن انہیں ہر طرح کی دھمکیاں مل رہی ہیں۔ وہ لوگ تقریباً ہر دن ہنددیوتاؤں کی توہین کرتے ہیں ۔ ہم کورٹ جاتے ہیں ۔‘‘
’’براہ کرم ڈان بننے کی ضرورت نہیں ہے۔ یہ افغانستان نہیں ہے۔ ہمارے پاس اچھی حکومت ہے جو جمہوریت نامی عمل کے ذریعے منتخب ہوئی ہے۔ یہ صرف ان لوگوں کے لیے یاد دہانی ہے جو بھول گئے ہیں۔ ‘‘اس کے علاوہ کنگنا نے قطر ائیرویز پر بنائی گئی دھوکہ دہی کی ویڈیو پر بھی ردعمل کا اظہار کرتے ہوئے اسے سچ قرار دیا۔
آپ کو بتاتے چلیں کہ چند روز قبل نوپور شرما ایک ڈیبیٹ شو میں پیغمبر اسلام محمدؐ کے بارے میں متنازعہ تبصرہ کرتے ہوئے بری طرح پھنس گئی ہیں۔ ہندوستان کی مسلم کمیونٹی کے علاوہ عرب ممالک کے لوگوں نے بھی نوپور شرما کی مخالفت کی ہے۔ اس معاملے میں بی جے پی کی جانب سے بیان جاری کرتے ہوئے کہا گیا کہ اس طرح کے ریمارکس پارٹی کے بنیادی خیالات کے خلاف ہیں۔
غور طلب ہے کہ نوپور کے اس بیان کے بعد دہشت گرد تنظیم القاعدہ کا ایک دھمکی آمیز خط وائرل ہو رہا ہے۔ جس میں لکھا ہے کہ دہلی سمیت ممبئی، گجرات اور یوپی میں فدائین حملے ہوں گے۔ القاعدہ نے کہا ہے کہ پیغمبر اسلام کی توہین کرنے والے ابھی انتظار کریں، نتائج جلد سامنے آئیں گے۔ جہادی اپنے جسموں پر بم رکھ کر ایسا کرنے والوں کوسبق سکھائیں گے۔ ان دھمکیوں کے بعد یہ خبریں سوشل میڈیا پر پھیل گئی ہیں۔