ممبئی :(ایجنسی)
مہاراشٹر میں جاری سیاسی اتھل پتھل کے درمیان وزیر اعلیٰ ادھو ٹھاکرے نے شیوسینا کے ضلع سربراہوں کی میٹنگ میں باغی ایم ایل اے کو سخت نشانہ بنایاہے ۔ جمعہ کو ضلع اور محکمہ کے سربراہوں سے خطاب کرتے ہوئے وزیر اعلیٰ ادھو ٹھاکرے نے کہا کہ آج وہی ایم ایل اے جن کی پرورش شیوسینا نے کی تھی وہ خود اپنی پارٹی کو تباہ کرنے میں لگے ہوئے ہیں۔
ٹھاکرے نے کہا کہ باغی ایم ایل اے نے شیوسینا کو توڑنے کا کام کیا ہے اور اگر آپ میں ہمت ہے تو آپ میری تصویر لگائے بغیر علاقے میں گھوم کر دکھاؤ ۔ وزیر اعلیٰ نے ایک بار پھر شیوسینکوں سے پارٹی کے لیے کام کرنے کو کہا ہے۔
جمعہ کو وزیر اعلیٰ اور شیوسینا سربراہ ادھو ٹھاکرے نے شیوسینا بھون میں ضلع سربراہوں کی میٹنگ بلائی تھی۔ ادھو ٹھاکرے نے ویڈیو کانفرنسنگ کے ذریعے اس میٹنگ میں شرکت کی۔ ادھو نے کہا کہ باغی ایم ایل اے شیوسینا کو توڑنے کا کام کر رہے ہیں۔
انہوں نے کہا کہ مجھے اقتدار کا لالچ نہیں ہے اور میں اس بات میں نہیں پڑنا چاہتا کہ کون میرے بارے میں کیا کہہ رہا ہے۔ باغی ایم ایل اے اور وزیر ایکناتھ شندے پر طنز کرتے ہوئے، ٹھاکرے نے کہا کہ جو لوگ کہتے تھے کہ ہم مرتے دم تک شیوسینا نہیں چھوڑیں گے، وہ مرنے سے پہلے شیوسینا چھوڑ چکے ہیں۔
باغی ایم ایل اے پر طنز کرتے ہوئے ٹھاکرے نے کہا کہ جو لوگ بڑی بڑی گاڑیوں میں میری فوٹو لگا کراپنی اپنی اسمبلی حلقے میں گھوما کرتے تھے، وہ تمام میری فوٹو کے بغیر سڑک پر نکل کر دکھائیں۔ ٹھاکرے نے کہاکہ جو لوگ چھوڑ کر چلے گئے ہیں مجھے ان کے بارے میں بالکل برا نہیں لگ رہاہے اور برا لگے گا بھی کیوں۔ میرا ماننا ہے کہ وزیر اعلیٰ کا عہدہ ایک خواہش ہے جو ہر کسی کو ہوتی ہے ۔ میں نے ضدنہیں چھوڑی ہے میں ابھی بھی اپنی ضد پر قائم ہوں۔
ادھو ٹھاکرے نے ایک بار پھر جذباتی لہجے میں کہا کہ میں سمجھتا تھا کہ میری وزیر اعلیٰ کی کرسی ہل رہی ہے لیکن حقیقت میں میری ریڑھ کی ہڈی ہل رہی ہے۔
بی جے پی کا نام لیے بغیر، ٹھاکرے نے الزام لگایا کہ ایم ایل اے کو لالچ دے کر اپنی طرف راغب کیا گیا ہے۔ ادھو ٹھاکرے نے ایکناتھ شندے کو نشانہ بناتے ہوئے کہا کہ میں نے ایکناتھ شندے کے لیے کیا نہیں کیا۔ میں نے ان کوسب سے اچھا شہری ترقی کی وزارت دی۔ اگر یہ سب کچھ پانے کے بعد بھی وہ میرے ساتھ ایسا سلوک کر رہا ہے تو یہ اس کی سوچ ہے۔
شیوسینا سربراہ نے باغی ایم ایل اے سنجے راٹھوڑ پر سنگین الزامات عائد کرتے ہوئے کہا کہ جب وہ وزیر تھے تو ان پر سنگین الزامات کا سامنا تھا لیکن اس کے بعد بھی میں نے انہیں سنبھالا۔ ٹھاکرے نے کہا کہ آپ درختوں کے پھول لے سکتے ہیں، شاخیں بھی لے سکتے ہیں لیکن درخت نہیں لے سکتے۔ آپ سبھی جو شیو سینا کے وجود پر سوال اٹھاتے ہیں انہیں دکھانا ہوگا کہ وہ شیو سینا کے ساتھ کس قسم کی وفاداری رکھتے ہیں۔
آدتیہ ٹھاکرے نے کہا کہ یہ پہلی بار نہیں ہے کہ شیوسینا میں بغاوت ہوئی ہو۔ اس سے پہلے بھی کئی لوگ بغاوت کر چکے ہیں لیکن شیوسینا وہی پرانی شیوسینا بنی ہوئی ہے۔
ایم ایل اے کا جانا جاری
دوسری طرف شیو سینا کے ہر روز ایم ایل اے باغی ہو کر ایکناتھ شندے کے کیمپ میں داخل ہو کر ادھو ٹھاکرے کی مشکلات میں اضافہ کر رہے ہیں، لیکن وزیر اعلیٰ ادھو ٹھاکرے اب تک خاموش تھے۔
جمعرات تک شیوسینا کے ایم ایل ایز کے ساتھ ممبئی میں رہے دلیپ مامالانڈے بھی جمعہ کو گوہاٹی پہنچ چکے ہیں۔ جہاں پر ان کا استقبال باغی ایم ایل ایز نے ہوٹل کے گیٹ پر آکر کیا۔ بتایا جا رہا ہے کہ اس وقت ایکناتھ شندے کے پاس شیوسینا کے تقریباً 42 ایم ایل ایز کی حمایت حاصل ہے ،جبکہ 12 ایم ایل اے آزاد بتائے جارہے ہیں۔ ایسے میں اس وقت ایکناتھ شندے کےساتھ تقریباً54 ایم ایل اے گوہاٹی کے ہوٹل میں موجود ہیں۔