لکھنؤ :
یوگی حکومت کورونا سے نمٹنے میں بری طرح ناکام ہو رہی ہے۔ اب اس نے اپنی ناکامی کو چھپانے کے لئے اسپتالوں پر ڈنڈا چلانے کا فیصلہ کیا ہے۔ اپنے حالیہ فیصلوں میںاعلان کیاہے کہ جو اسپتال اپنے یہاں آکسیجن کی کمی کی شکایت کر کے نوٹس چسپاں کررہے ہیں یا اس بارے میں میڈیا سے بات کررہے ہیں ان کے خلاف سخت کارروائی کی جائے گی۔ ساتھ ہی ان اسپتالوں کو بھی نہیں بخشا جائے گا جو آکسیجن کی کمی کی وجہ سے مریضوں کی بھرتی نہیں کررہے ہیں یاپھر اپنے اسپتالوں میں آکسیجن نہیں ہونے کا نوٹس چسپاں کررہے ہیں۔ اس کے علاوہ اس بات کی بھی جانچ ہوگی کہ کہیں ایسے اسپتال اس طرح کی بات کرکے خوف وہراس تو نہیں پھیلا رہے ہیں۔
کولکاتا سے نکلنے والا اخبار ، ’دی ٹیلی گراف‘ نے اس بارے میں ایک خبر شائع کی ہے۔ اخبار کے مطابق وزیر اعلیٰ یوگی آدتیہ ناتھ نے افسران کے ساتھ ایک میٹنگ میں اس کے بارے میں احکامات دیئے ہیں۔ اتوار کو ہونے والی اس میٹنگ میں وزیر اعلیٰ نے سینئر افسران ، ڈویژنل کمشنرز اور انسپکٹر جنرل پولیس کو واضح ہدایت دی ہے کہ ایسے اسپتالوں کے خلاف سخت کارروائی کی جائے جو آکسیجن کی کمی کی وجہ سے مریضوں کو اسپتال سے فارغ کررہے ہیں اور اس معاملے میں میڈیا کو جانکاری دی جارہی ہے۔
آن لائن پورٹل ’ستیہ ہندی‘ میں مسلسل یوپی میں کورونا سے متعلق صورتحال سے آگاہ کررہا ہے۔ چاروں طرف افراتفری ہے۔ لوگوں کو اسپتالوں میں بستر نہیں مل رہے ہیں۔ آکسیجن کی کمی کی وجہ سے مریضوں کی موت ہو رہی ہے۔ شمشان میں لاشوں کے ڈھیر لگے ہیں۔حکومت اپنی غلطی تسلیم کرنے کو تیار نہیں ہے کہ اس نے بروقت صحت نظام کو مستحکم نہیں کیا ہے۔ اب یہ شکایات بھی سامنے آ رہی ہیں کہ ریاست میں کورونا ٹیسٹ ٹھیک طرح سے نہیں ہو رہے ہیں۔ سرکاری اعدادوشمار میں بھی ہلاکتوں کی تعداد کم بتائی جارہی ہے۔
دریں اثناء اترپردیش میں آکسیجن کی فراہمی روزانہ بہتر ہونے کا دعویٰ کرتے ہوئے وزیر اعلیٰ یوگی آدتیہ ناتھ نے کہا کہ تمام اضلاع کے ہر چھوٹے بڑے اسپتال کی نگرانی کی جانی چاہئے۔ جسے بھی ضرورت ہوگی آکسیجن ضرور مہیا کی جائے۔
وہیں کانپور میں ڈاکٹر کے خلاف مقدمہ درج کرنے کے ڈسٹرکٹ مجسٹریٹ کے حکم کے سلسلے میں پروونشیل میڈیکل سروس ایسوسی ایشن نے وزیراعلیٰ کو خط لکھ کر نوکرشاہوں پر من مانی کرنے کا الزام لگایا ہے اور ڈاکٹروں کے حقوق کی حفاظت کرنے کی اپیل کی ہے۔ایسوسی ایشن کے جنرل سکریٹری ڈاکٹر امت سنگھ نے منگل کو وزیر اعلی یوگی آدتیہ ناتھ کو لکھے خط میں کہا ہے کہ کورونا کی وبا کی آڑ میں انتظامیہ افسروں کے ذریعہ ڈاکٹروں کو مسلسل پریشان کیا جارہا ہے۔ ایسے حالات میں جب سبھی ڈاکٹر انفیکشن کے خلاف فیصلہ کن کردار ادا کررہے ہیں۔ضلع سطحی افسر ڈاکٹروں کے حوصلے کو توڑنے کا کام کررہے ہیں۔