رامپور:(آر کے بیورو)
اترپردیش اسمبلی انتخابات میں رامپور کی سوار سیٹ سے سماج وادی پارٹی (ایس پی) امیدوار عبداللہ اعظم خاں نے وزیر اعلیٰ یوگی آدتیہ ناتھ اور بھارتیہ جتنا پارٹی (بی جے پی) کے لیڈروں کے متضاد بیانوں کا حوالہ دیتے ہوئے کہا کہ بی جے پی کی ڈبل انجن کی حکومت، دو مختلف سمتوں میں چل رہی ہے۔
عبداللہ اعظم نے جیل میں قید والد و رامپور سے ایس پی امیدوار اعظم خاں کی رہائی کے بارے میں وزیر اعلیٰ یوگی اور وفاقی وزیر داخلہ امت شاہ کے متضاد بیانات پر پلٹ وار کیا۔ انہوں نے منگل کی رات یہاں کارکن سمیلن میں کہا کہ وزیر اعلیٰ کا دعویٰ ہے کہ ایس پی سربراہ اکھلیش یادو اعظم خاں کی جیل سے رہائی نہیں چاہتے ہیں۔ جبکہ وزیر داخلہ امت شاہ کہہ رہے ہیں کہ اگر یوگی کی حکومت نہ ہوتی تو اعظم خاں جیل میں نہیں ہوتے۔
عبداللہ نے کہا کہ پہلے بی جے پی اپنا رخ صاف کرے۔ انہوں نے کہا کہ بی جے پی کی ڈبل انجن کی حکوت میں دونوں انجن الگ الگ سمتوں میں چل رہے ہیں۔ انہوں نے دلیل دی’وزیر داخلہ کہتے ہیں کہ یوگی کی حکومت نہ ہوتی تو اعظم خاں جیل میں نہیں ہوتے جبکہ ان کے برخلاف یوگی کہتے ہیں کہ حکومت کا اعظم خاں کے جیل میں ہونے سے کوئی لینا دینا نہیں ہے۔ قابل ذکر ہے کہ اسمبلی انتخابات کے دوسرے مرحلے میں رامپور سمیت نو اضلاع کی 55 سیٹوں پر پیر کو ووٹنگ ہوچکی ہے۔ عبداللہ نے ووٹنگ میں بڑھ چڑھ کر حصہ لینے کے لئے پارٹی کارکنوں اور عوام کا شکریہ ادا کیا۔