رامپور:(آر کےبیورو)
اترپردیش اسمبلی الیکشن کے درمیان، سماج وادی پارٹی کے موجودہ لوک سبھا ایم پی اعظم خاں، ان کی اہلیہ اور ایس پی ایم ایل اے ڈاکٹر تزئن فاطمہ اور بیٹے عبداللہ اعظم خاں کے خلاف جاری تین مقدمات کی سماعت ہوئی۔ جس میں گواہوں کو جرح کے لیے طلب کیا گیا۔ لیکن صرف ایک گواہ موجود تھا جس پر وکیل دفاع نے جرح کی۔ ساتھ ہی غیر حاضر رہنے والے دو گواہوں کو آئندہ تاریخ پر طلب کر لیا ہے۔ پوچھ گچھ کے دوران شکایت کنندہ بی جے پی لیڈر آکاش سکسینہ عدالت میں موجود تھے۔
رامپور کے ایم پی ایم ایل اے اسپیشل مجسٹریٹ کورٹ میں لوک سبھا ایم پی اعظم خاں، ایس پی ایم ایل اے ڈاکٹر تزئن فاطمہ اور عبداللہ اعظم خاں کے خلاف برتھ سرٹیفکیٹ کے دو مقدمات کی سماعت ہوئی۔ گواہ، بلدیہ رجسٹرار کو جرح کے لیے طلب کیا گیا لیکن میونسپل رجسٹرار نہیں آئے، اس لیے عدالت نے سمن جاری کرتے ہوئے اگلی تاریخ 28 فروری مقرر کر دی ہے۔ اسی دوران، عبداللہ اعظم خاں اور ایس بی آئی کے برانچ منیجر کو اعظم خاں کے خلاف جاری دو پین کارڈ کیس میں آنا تھا لیکن وہ نہیں آئے۔ جس کے بعد عدالت نے سمن جاری کرتے ہوئے 5 مارچ کی تاریخ مقرر کر دی ہے۔ اب ان دونوں گواہوں کو سمن جاری کر کے جرح کے لیے طلب کر لیا گیا ہے۔
برتھ سرٹیفکیٹ اور دو پین کارڈ کیس میں نہیں آئے گواہ
اس کے ساتھ ہی، دو پاسپورٹ کیس کے گواہ ایف آئی آر لکھنے والے اکھلیش کمار، جو اس وقت کے پولیس اسٹیشن سول لائن میں تعینات تھے، سے دفاع نے پوچھ گچھ کی۔ اس معاملے کی اگلی سماعت 25 فروری کو ہوگی جس میں اگلے گواہ کو طلب کیا گیا ہے۔ اعظم خاں کے وکیل ایڈووکیٹ زبیر خان نے بتایا کہ عدالت نے 3 کیسز کی سماعت کی جس میں دو برتھ سرٹیفکیٹ اور دو پین کارڈ معاملے میں گواہ نہیں آئے جب کہ دو پاسپورٹ کیسز میں گواہ کانسٹیبل اکھلیش کمار سے جرح مکمل کی گئی۔ عدالت نے تینوں مقدمات کی سماعت کی اگلی تاریخ مقرر کی ہے۔