لکھنؤ :(ایجنسی)
اتر پردیش میں 403 اسمبلی سیٹوں کے لیے ووٹنگ ہوچکی ہے۔ انتخابات کے نتائج 10 مارچ کو آنے والے ہیں۔ انتخابی نتائج سے قبل سامنے آنے والے ایگزٹ پولز میں یوپی میں بھارتیہ جنتا پارٹی (بی جے پی) کے دوبارہ اقتدار میں آنے کے اندازے لگائے گئے ہیں۔ ایگزٹ پول پر سماج وادی پارٹی (ایس پی) نے ٹویٹ کیا ہے کہ نتائج کا اعلان 10 مارچ کو ہوگا، حکومت ہم ہی بنائیں گے۔
ایس پی کے اتحادی سہیل دیو بھارتیہ سماج پارٹی (ایس بی ایس پی) کے صدر اوم پرکاش راج بھر نے بھی اتحادپارٹی کے سر میںسر ملاتے ہوئے کہاکہ ایگزٹ پول کھبی درست ثابت نہیں ہوئے۔ 10 تاریخ کو ایس پی اتحاد زبردست اکثریت کے ساتھ حکومت بنائے گا۔ اتر پردیش میں سماج وادی پارٹی کی حکومت بنے گی۔ نتائج 10 تاریخ کو آئیں گے۔ انہوں نے کہا کہ ایگزٹ پول ہمیشہ چائے کے اسٹالوں پر منعقد ہوتے ہیں جہاں بی جے پی کے حامی رہتے ہیں۔
آج تک سے بات کرتے ہوئے، سہیل دیو بھارتیہ سماج پارٹی صدر نے کہا کہ راج بھر، چوہان، بند، گونڈ، نشاد جیسے پسماندہ طبقات کے لوگ وہاں بی جے پی کے حامیوں کے سامنے نہیں بولتے ہیں۔ اسی لیے ایگزٹ پول میں بی جے پی کو اکثریت ملتی رہی ہے، لیکن جب نتائج آئے تو معاملہ الٹ گیا، ایسا کئی بار ہوا ہے۔ عباس انصاری کے بیان پر اوم پرکاش راج بھر نے کہا کہ جب جسم کی پانچوں انگلیاں برابر نہیں ہیں تو پھر چار لوگوں میں ایک جیسا نظریہ کیسے ہو سکتا ہے۔ اکھلیش یادو اقتدار میں آنے پر وزیر اعلیٰ ہوں گے۔
انہوں نے کہا کہ ہم حکومت میں ہیں تو فیصلہ کرنا ہے کہ حکومت کیسے چلائیں گے۔ ایس بی ایس پی کے صدر نے کہا کہ 10 تاریخ کو دو گانے چلائے جائیں گے۔ ایک- چل سنیاسی مندر میں اور دوسرا – میرےآگن میں تمہارا کیا کام ہے ۔ یوپی کے انتخابی نتائج کو لے کر آئے ایگزٹ پول پر بہار کے اسمبلی میں اپوزیشن کے لیڈر تیجسوی یادو نے بھی طنز کیا ہے ۔
تیجسوی نے ایگزٹ پولز پر طنز کیا
ایس پی کے بعد اب بہار کی اپوزیشن پارٹی راشٹریہ جنتا دل (آر جے ڈی) کے ایم ایل اے اور بہار اسمبلی میں اپوزیشن لیڈر تیجسوی یادو نے بھی ایگزٹ پول پر طنز کیا ہے۔ جس طریقے سے ایگزٹ پولز کے اندازے کے گئے ہیں ، اسے لے کر تیجسوی یادونے طنز کرتے ہوئے کہاہے کہ بی جے پی کو ایگزٹ پول میں جیت کے لڈو کا مزہ لینے دیجئے ۔
تیجسوی نے کہا ہے کہ ایگزٹ پول میں بی جے پی والوں کو جیت کے لڈو کھانے دیں، 10 مارچ کو نتائج آنے پر اکھلیش یادو حقیقی جیت کے لڈو کھائیں گے۔ ایگزٹ پول سے بہار بی جے پی میں خوشی کا ماحول ہے۔ بہار بی جے پی کے صدر ڈاکٹر سنجے جیسوال نے یوپی میں پارٹی کی جیت کا یقین ظاہر کرتے ہوئے کہا کہ جو بھی عوام کے لیے کام کرے گا، عوام اسے دوبارہ منتخب کرکے اقتدار میں ضرور لائیں گے۔
انہوں نے کہا ہے کہ عوام کے لیے، غریبوں کے لیے اور عوام کی سہولتوں کے لیے جو بھی کام کریں گے، دوبارہ حکومت ضرور بنائیں گے۔ جس طرح نریندر مودی نے گجرات میں الیکشن جیت کر ریکارڈ بنایا تھا، یوگی آدتیہ ناتھ بھی کچھ ایسا ہی کریں گے۔ غور طلب ہے کہ ایگزٹ پول کے نتائج میں بی جے پی کی زبردست جیت کی پیشین گوئیاں ظاہر کی گئی ہیں۔ آج تک ایکسس مائی انڈیا کے ایگزٹ پول نے بی جے پی کو 288 سے 326 سیٹوں کی پیشین گوئی کی ہے۔