بنگلورو :(ایجنسی)
کرناٹک میں کسان لیڈر راکیش ٹکیت کی سیکورٹی میں بڑی کوتاہی کا معاملہ سامنے آیا ہے۔ راکیش ٹکیت پر پیر کو بنگلور ومیں کچھ لوگوں نے حملہ کیا۔ پہلے ٹکیت پر مائیک سے حملہ کیا گیا۔ اس کے بعد ایک اور شخص نے ان پر سیاہی پھینک دی۔ بتایا جا رہا ہے کہ ٹکیت پر حملہ کرنے والے مقامی کسان لیڈر کے چندر شیکھر کے حامی تھے۔ اس کے بعد راکیش ٹکیت کے حامیوں نے حملہ کرنے والے اور سیاہی پھینکنے والے شخص کو پکڑ لیا۔ پروگرام میں کرسیاں بھی چلیں۔
بتایا جا رہا ہے کہ یہ سیاہی مقامی کسان لیڈر کے چندر شیکھر کے حامیوں نے پھینکی تھی۔ دراصل، یہاں کے مقامی میڈیا نے حال ہی میں کے چندر شیکھر کے بارے میں ایک اسٹنگ کیا تھا۔ اس ویڈیو میں کے چندر شیکھر نے بس ہڑتال کے لیے رقم کی مانگ کی تھی۔ یہی نہیں، انہوں نے راکیش ٹکیت اور دیگر کسان لیڈروں کا بھی ذکر کیا تھا۔
بنگلورو میں میڈیا سے بات چیت کے دوران جب راکیش ٹکیت سے کے چندر شیکھر کے بارے میں پوچھا گیا تو انہوں نے کہا کہ ان کا کے چندر شیکھر سے کوئی تعلق نہیں ہے۔ راکیش ٹکیت نے کہا، کے چندر شیکھر ایک فراڈ ہے۔ اس کے بعد اچانک چندر شیکھر کے حامیوں میں سے ایک نے راکیش ٹکیت پر سیاہی پھینک دی۔
اس سے راکیش ٹکیت کے پروگرام میں موجود حامی ناراض ہو گئے۔ انہوں نے سیاہی پھینکنے والے کو پکڑ لیا۔ اس کے بعد چندر شیکھر کے حامیوں اور راکیش ٹکیت کے حامیوں میں جھڑپ ہوگئی۔ دونوں فریقین میں زبردست لڑائی ہوئی اور کرسیاں چلیں۔ اس کے بعد پروگرام میں کافی ہنگامہ آرائی اور نعرے بازی ہوئی۔ دوسری طرف راکیش ٹکیت نے کرناٹک پولیس پر سوال اٹھائے۔