لکھنؤ:
اترپردیش میں کورونا انفیکشن کے نئے کیسز کی رفتار سے فکرمند حکومت نے اس انفیکشن پر قابو پانے کے لئے تمام اقدامات اٹھائے ہیں۔ اس کے تحت غازی آباد اور نوئیڈا سمیت کچھ مزید اضلاع میں نائٹ کرفیو نافذ کردیا گیا ہے ، جبکہ انفیکشن سے سب سے زیادہ متاثرہ 13 اضلاع میں نوڈل افسران تعینات کردیئے گئے ہیں۔
سرکاری ذرائع نے بتایا کہسی ایم یوگی آدتیہ ناتھ خود بھی کورونا انفیکشن کی بگڑتی ہوئی صورتحال پر گہری نظر رکھے ہوئے ہیں۔ ریاست میں کورونا کے فعال کیسوں کی تعداد 40 ہزار کے قریب پہنچ چکی ہے ، ان میں سے ایک چوتھائی سے زیادہ مریض صرف لکھنؤ کے ہیں۔ گزشتہ 24 گھنٹوں کے دوران ریاست میں کورونا کے 8490 نئے کیس رپورٹ ہوئے جن میں لکھنؤ میں مریضوں کی تعداد 2369 تھی۔ اس عرصے کے دوران پوری ریاست میں 39 مریضوں کی موت ہوگئی۔
وزیر اعلیٰ یوگی آدتیہ ناتھ کی ہدایت کے بعد لکھنؤ ، کان پور ، پریاگ راج ، نوئیڈا ، غازی آباد اور وارانسی میں نائٹ کرفیو نافذ کردیا گیا ہے ، جبکہ مزید چند اضلاع میں بھی اس کے بعد کارروائی کا امکان ہے۔ کورونا انفیکشن پر قابو پانے کے لئے 13 اضلاع میں نوڈل افسران تعینات کے گئے ہیں جو مریضوں کے علاج اور کورونا انفیکشن کی روک تھام کے لئے ضروری فیصلے کریں گے اور اس پر عمل درآمد کریں گے۔
ان اضلاع میں لکھنؤ ، کانپور ، غازی آباد ، گوتم بدھ نگر ، وارانسی ، میرٹھ ، گورکھپور ، جھانسی ، آگرہ ، سہارنپور ، بریلی اور مراد آباد شامل ہیں۔ ریاست کے تمام سرکاری غیر سرکاری اسپتالوں میں بستروں کی تعداد بڑھانے کی ہدایت دی گئی ہے۔ ریاست کے سرکاری ، پرائیویٹ اسپتال والے خصوصی طبی اداروں میں 278 آئی سی یو بیڈ میں اضافہ کیا جائے گا۔
ڈرگ کنٹرولر اے کے جین نے کہا کہ ریاست میں انفیکشن سے متعلقہ تمام دوائیں اور دیگر چیزیں کافی ہیں ، جن میں سینیٹائزر ، پی پی ای کٹ ، آئیور میکٹن ، ایزیٹرومائسن شامل ہیں۔ ریاست میں کووڈ- 19 کے لیول ٹوکے تین اسپتالوں میں آئی سی یو کے 4333 بیڈ ہیں ، جنہیں اب بڑھا کر 4611 کردیا جائے گا۔ اس کے ساتھ ہی ریاست میںآئیسولیشن بیڈوں کی تعداد بڑھا کر 16422 آئیسولیشن بیڈکئے جائیں گے۔
محکمہ صحت سے موصولہ اطلاع کے مطابق گزشتہ 24 گھنٹوں کے دوران پریاگ راج میں 1040 ، وارانسی میں 794 ، کانپور میں 368 ، گورکھپور میں 259 ، میرٹھ میں 222 ، نوئیڈا میں 134 ، غازی آباد میں 108 ، جھانسی میں 180 ، بریلی میں133 ، سہارنپور میں 109، بارہ بنکی میں 73 ، بلیا میں 75 ، متھرا میں 85 ، مراد آباد میں 84 اور مظفر نگر میں 83 نئے مریض پائے گئے ہیں۔ اس عرصے کے دوران لکھنؤ میں 11 ، پریاگ راج میں چھ ، کانپور میں چار ، میرٹھ اور وارانسی میں دو ، دو مریضوں نے کوروناسے دم توڑ دیا۔
اب تک ریاست میں کورونا سے ہلاکتوں کی تعداد 9003 ہے۔ کورونا کی دوسری لہر میں صحت یاب لوگوں کی تعداد نئے کیسوں سے بہت کم ہے ، جو آنے والے دنوں میں حکومت اور ضلع انتظامیہ کے لئے چیلنج ہوسکتے ہیں۔