پٹنہ : (ایجنسی)
بہار کے سابق سی ایم جیتن رام مانجھی نے جموں و کشمیر میں دہشت گردوں کی جانب سے باہری لوگوں کی ’ٹارگٹ کلنگ‘ پر ٹویٹ کیا ہے۔ انہوں نے کہا ہے کہ پی ایم مودی اور وزیر داخلہ امت شاہ کو کشمیر کی ذمہ داری بہار کے لوگوں کودے دیں اور وہ لوگ 15 دنوں میں حالات سدھار کر دکھائیں گے ۔
واضح رہے کہ جموں وکشمیر میں فوج کے انسداد دہشت گردی آپریشن سے بوکھلائے دہشت گرد ایک کے بعد ایک غیر کشمیریوں کو نشانہ بناتے جارہے ہیں ۔ اتوار کو جنوبی کشمیر کے کلگام ضلع میں دہشت گردوں نے بہار کےرہنے والے دو مزدوروں کا قتل کردیا ۔ مقتول کی شناخت بہار کے رہنے والے راجا اور جوگیندر کے طور پر ہوئی ہے ۔
اس پر بہار کے سابق سی ایم مانجھی نے لکھا :’ کشمیر میں لگاتار ہمارے نہتے بہاری بھائیوں کا قتل کیا جا رہا ہے جس سے ذہن پریشان ہے ۔ اگر حالات میں بدلاؤ نہیں ہو پا ہے ہیں تو وزیر اعظم نریندر مودی اور امت شاہ سے اپیل ہے ،کشمیر کو سدھارنے کی ذمہ داری ہم بہاریوں پر چھوڑ دیجئے ،15 دن میں سدھار نہیں دیا تو کہئے گا ۔
سی ایم نتیش کمار نے کشمیر میں بہار کے لوگوں پر ہوئے حملوں پر بھی تشویش کا اظہار کیا تھا۔ انہوں نے ریاست کے لیفٹیننٹ گورنر منوج سنہا سے بھی بات کی۔ اس کے علاوہ ہلاک ہونے والوں کے لواحقین کو 2-2 لاکھ روپے معاوضے کا اعلان کیا تھا۔