شرومنی اکالی دل کے سربراہ سکھبیر سنگھ بادل نے راجستھان کے بانسواڑہ میں انتخابی ریلی میں وزیر اعظم نریندر مودی کے بیان پر تنقید کی ہے۔
پیر کو جالندھر میں صحافیوں سے بات کرتے ہوئے، انہوں نے کہا، "وزیراعظم کو ایسا بیان کبھی نہیں دینا چاہیے تھا جس سے ملک کے لوگوں میں فرقہ وارانہ منافرت، باہمی شکوک اور زہر پھیلتا ہو۔”
انہوں نے کہا، "ہندوستان ہندوؤں، سکھوں، مسلمانوں، عیسائیوں، سب کا ہے۔ وزیر اعظم اور بی جے پی کو سردار پرکاش سنگھ بادل سے سیکھنا چاہیے کہ امن اور فرقہ وارانہ ہم آہنگی کو کیسے یقینی بنایا جائے۔”
کئی اپوزیشن لیڈروں نے بانسواڑہ میں وزیر اعظم مودی کے بیان کی سخت تنقید کی اور اسے نفرت انگیز تقریر قرار دیا۔
پی ایم مودی نے راجستھان میں منعقدہ ایک ریلی میں سابق وزیر اعظم منموہن سنگھ کی ایک پرانی تقریر کا حوالہ دیتے ہوئے مسلمانوں پر تبصرہ کیا تھا، جس میں انہوں نے انہیں ‘درانداز’ اور ‘زیادہ بچے پیدا کرنے والے’ کہا تھا۔ کانگریس نے بی جے پی اور دیگر کے خلاف الیکشن کمیشن میں 16 شکایتیں درج کرائی ہیں۔
ایسے ماحول میں بی جے پی کی دیرینہ حلیف اکالی دل کا بیان سرخیوں میں ہے۔
اکالی دل (بادل) کے ترجمان پرمبنس سنگھ رومانا کا کہنا ہے کہ "اس طرح کے بیانات سماجی تانے بانے کو متاثر کرتے ہیں۔ اگر ہندوستان کے وزیر اعظم کہیں کھڑے ہو کر کسی اقلیت کو نشانہ بناتے ہوئے بولتے ہیں تو ہم اس کی سخت مذمت کریں گے۔”