لکھنؤ :(ایجنسی)
یوپی میں اسمبلی انتخابات کے درمیان انکم ٹیکس ڈپارٹمنٹ نے سماج وادی پارٹی کے لیڈروں کے ٹھکانوں پر چھاپہ ماری کی ہے۔ میڈیا رپورٹ کے مطابق ہفتہ کی صبح کچھ ایسے لیڈروں کے گھروں پر چھاپے مارے گئے جو ایس پی کے قومی صدر اکھلیش یادو کے قریبی بتائے جاتے ہیں۔ محکمہ انکم ٹیکس نے ہفتہ کو سماج وادی پارٹی کے قومی سکریٹری اور ترجمان راجیو رائے کے مؤ میں واقع رہائش گاہ پر چھاپہ مارا۔ محکمہ انکم ٹیکس کی ٹیم نے لکھنؤ میں جینندر یادو اور مین پوری میں منوج یادو کے گھروں پر بھی چھاپے مارے ہیں۔ یہ لوگ سماج وادی پارٹی کے سربراہ اکھلیش یادو کے قریبی بتائے جاتے ہیں۔
ہفتہ کی صبح وارانسی سے محکمہ انکم ٹیکس کی ایک ٹیم مؤ پہنچی اور شہادت پورہ میں ان کے گھر کی تلاشی شروع کردی۔ چھاپے کے دوران ایس پی کے قومی سکریٹری راجیو رائے کو دو گھنٹے تک گھر میں نظر بند کر دیا گیا۔ چھاپے کی خبر پھیلتے ہی ایس پی کارکنوں نے راجیو رائے کے گھر کے باہر ہنگامہ کھڑا کر دیا، جس کے پیش نظر بڑی تعداد میں پولیس موقع پر تعینات کر دی گئی ہے۔
خبر رساں ایجنسی اے این آئی کے مطابق، اس چھاپے پر ایس پی لیڈر راجیو رائے نے کہا،’انکم ٹیکس محکمہ کے لوگ آئے ہیں۔ میرا کوئی مجرمانہ ریکارڈ نہیں ہے۔ میرے پاس کوئی غیر قانونی پیسہ نہیں ہے۔لوگوں کی مدد کرنا بی جے پی کو پسند نہیں ہے۔
سماج وادی پارٹی کے قومی سکریٹری راجیو رائے کے گھر پر انکم ٹیکس محکمہ کے چھاپے پر ایس پی ضلع صدر لوہیا واہنی دھیرج راج بھر نے کہا،’آج صبح اچانک کسی محکمہ کےلوگ آئےہیں۔ ہمیں اندرجانے نہیں دے رہےہیں اورنہ کچھ بتا رہےہیں کہ کیاکارروائی چل رہی ہے ۔ اندر سےدورازہ بند ہے۔
محکمہ انکم ٹیکس کی اس کارروائی پر برہم ہوئے ایس پی سربراہ نے بی جے پی کو نشانہ بنایا۔ اکھلیش یادو نے ٹویٹ کیا، ’بی جے پی کی ہار کا جتنا خوف بڑھتا جائے گا، اپوزیشن پر چھاپوں کا دور بھی بڑھتاجائے گا، پھر بھی ایس پی کا رتھ اور ہر پروگرام بدستورچلتا جائےگا۔ اب تو عوام پوری طرح بی جے پی کےخلاف اپوزیشن کےساتھ کھڑی ہے۔ اب کیا بائیس کےلیےبی جے پی حکومت اترپردیش کے بائیس کروڑعوام کےیہاںچھاپے ڈالےگی۔‘‘
’آج تک‘ کی رپورٹ کے مطابق محکمہ انکم ٹیکس نے لکھنؤ کے جینندر یادو، مین پوری کے منوج یادو اور سماج وادی پارٹی کے ترجمان راجیو رائے کے گھروں پر ہفتہ کی صبح مئو میں چھاپہ مارا۔ اطلاعات کے مطابق انکم ٹیکس حکام پورے اہلکاروں کی پوری فوج کے ساتھ چھاپہ مارنے کے لئے پہنچے ہیں۔
محکمہ انکم ٹیکس کی ٹیم گھر کے کونے کونے کی چھان بین کر رہی ہے۔ جہاں جہاں محکمہ کی ٹیمیں کارروائی کر رہی ہیں، ان گھروں کو سیکورٹی فورسز نے اپنے حصار میں لے رکھا ہے اور کسی کو بھی اندر جانے کی اجازت نہیں دی جا رہی ہے۔
دوسری جانب لکھنؤ میں امبیڈکر پارک کے قریب واقع جینندر یادو کی رہائش گاہ پر بھی چھاپہ مارا گیا ہے۔ محکمہ انکم ٹیکس کی ٹیم نے جیننددر یادو کے گھر کی باریکی سے تلاشی لی۔ اس کے علاوہ محکمہ انکم ٹیکس کی ٹیم نے اکھلیش یادو کے قریبی آر سی ایل گروپ کے مالک منوج یادو کے گھر پر بھی چھاپہ مارا ہے۔ اس دوران ٹیم کسی کو گھر کے اندر جانے کی اجازت نہیں دے رہی ہے اور موقع پر بڑی تعداد میں پولیس فورس تعینات ہے۔