نئی دہلی:
شاہین باغ کے نزدیک کنچن کنج میں تقریباً 55 جھگیوں میں250 روہنگیائی پناہ گزین کئی سال سے رہتے ہیں، رات قریب ساڑھے گیارہ بجے اچانک جھگیوں میں آگ لگ گئی اور دیکھتے ہی دیکھتے تمام جھگیاں جل کر راکھ ہوگئیں،بڑی مشکل سے پناہ گزیں روہنگیائی اپنی اوراپنے بچوں کی جان بچاسکے، جوکچھ تھوڑا بہت سامان تھاوہ سب جل گیا، بلکہ سامان اور جھگیاں سب خاکستر ہوگیا۔ تپش اورامس بھری گرمی میں تمام کے تمام پناہ گزیں کھلے آسمان کے نیچے رہنے پر مجبور ہیں۔
ناظم اعلیٰ جمعیۃ صوبہ دہلی مولانا مفتی عبدالرزاق مظاہرین کے پریس نوٹ کے مطابق حادثہ کے بعد سے ہی جمعیۃ علماء کے ارکان وہاں موجود ہیں اور ہر طرح کی بنیادی چیزیں مہیاکرارہے ہیں۔ صبح کو اس پورے واقعہ کی اطلاع صدر جمعیۃ علماء ہند مولانا سید ارشد مدنی کو دی گئی،صدر محترم نے جھگیاں دوبارہ بنانے اور ہرطرح کے تعاون کرنے کی ہدایت کی ہیں، چنانچہ مولانامدنی کی ہدایت پر مفتی عبدالرازق مظاہری جنرل سکریٹری جمعیۃ دہلی کی سربراہی میں ایک وفد نے حالات کا جائزہ لیا۔ جمعیۃکے وفدنے فوری طورپرنماز کے لئے مختص عارضی جگہ پر ترپال وغیرہ ڈال کرظہر نماز پناہ گزینوں کے ساتھ اداکی اور ان پناہ گزینوں کو ہر ممکن مددکی یقین دہانی کرائی۔
اس کے بعدوفدنے علاقے کے ایس ڈی ایم،ایس ایچ اواور یوپی ایریگیشن کے جے ای سے موقع پر ہی بات چیت کی اور متاثرین کے لئے مکمل تعاون کا مطالبہ کیا، جس پر ایس ڈی ایم نے فوری طور پر ٹینٹ لگا کر پناہ گزینوں کو اس میں رکھنے کی یقین دہانی کرائی اور اپنے ماتحت افسران کو فوری طور پر اس کے احکامات بھی جاری کردئے۔ نیز ایس ایچ او نے بھی ہر طرح کے تعاون کی یقین دہانی کرائی ہے۔
دوسری طرف وہاں پر موجود یوپی ایریگیشن کے افسران سے جب ہم نے تعاون کا مطالبہ کیاتو ان کا جواب چوکانے والا تھا، ایک سینئر افسر نے کہا ہم بھی چاہتے ہیں کہ ان پریشان حال لوگوں کا تعاون کیا جائے لیکن ہمیں اوپر سے آڈر ہے کہ ان روہنگیاؤں کو یہاں نہ بسنے دیا جائے اس سلسلے ہم مجبور ہیں ہماری نوکری کا معاملہ ہے، فی الحال دہلی سرکار کی جانب سے ٹینٹ لگاکر پناہ گزینوں کو ان میں رکھا جائے گا، لیکن یہ مستقل حل نہیں ہے،اس لئے مولانا مدنی کی ہدایت پر ان کے لئے مستقل کیمپ بنانے کی کوششیں جاری ہیں۔ مختلف حکام اور حکومت سے رابطہ بھی کیاجارہاہے، تاکہ اس پریشان حال لوگوں کے لئے بنیادی ضروریات کی چیزیں مہیاکی جاسکے۔جب تک ان بے گھرلوگوں کے کھانے اور ضروری اشیاء کی فراہمی کا سلسلہ ان شاء اللہ جمعیۃ علماء ہند کی جانب سے جاری رہےگا۔
وفد میں مولانا محمد راشد نائب صدر جمعیۃ علماء ضلع جنوب مشرقی دہلی،مولانا عبداللہ نائب صدر جنوب مشرقی دہلی، مولانا شہزاد نائب سکریٹری جنوب مشرقی دہلی،حافظ محمد یوسف رکن جمعیۃ علماء ہند،قاری محمد صادق رکن جمعیۃ علماء ہند، قاری عبدالمنان رکن جمعیۃ علماء ہند،مفتی منصور رکن جمعیۃ علماء ہند شامل تھے۔