سری نگر :
جنوبی ضلع کولگام کے برازلو کولگام میں منگل کو ملی ٹینٹوں نے بھارتیہ جنتا پارٹی (بی جے پی) کے ایک کارکن کا گولی مار کر قتل کر دیا۔ سرکاری ذرائع نے بتایا کہ ملی ٹینٹوں نے برازلو جاگیر میں جاوید احمد ڈار ولد غلام عبداللہ ڈار نامی بی جے پی کارکن پر ان کے گھر کے باہر نزدیک سے گولیاں چلائیں۔ انہوں نے بتایا کہ زخمی جاوید احمد کو فوری طور پر قریبی اسپتال منتقل کیا گیا جہاں ڈاکٹروں نے انہیں مردہ قرار دیا۔ ڈار کے قتل کے بعد پولیس اور سی آر پی ایف نے علاقہ کو سیل کردیا ہے اور ملی ٹینٹس کی تلاش جاری ہے ۔
جموں و کشمیر میں بی جے پی کے ترجمان الطاف ٹھاکر نے کہا کہ جاوید احمد ڈار بی جے پی حلقہ صدر ہوم شالی بگ تھے۔ انہوں نے اپنے پارٹی کارکن کے قتل کی مذمت کرتے ہوئے کہا ہے کہ ملی ٹینٹس بے گناہ لوگوں کو نشانہ بنا رہے ہیں ۔
دریں اثنا سابق وزرائے اعلیٰ عمر عبداللہ اور محبوبہ مفتی نے بی جے پی کارکن کے قتل کی سخت الفاظ میں مذمت کی ہے ۔