دیوبند: (سمیر چودھری)
جمعیۃ علماء ہند کے سربراہ مولانا سید ارشد مدنی بی جے پی لیڈر کی رہائش پر منعقد ہولی ملن پروگرام میں پہنچے۔ اس دوران مولانا مدنی نے کہا کہ ہم سب ایک ماں باپ کی اولاد ہیں، ہمیں آپسی بھائی چارے کے ساتھ رہنا چاہیے۔ مذہب سے اوپر اٹھ کر انسانیت کا معاملہ ہونا چاہیے۔
مولانا نے کہا کہ ہماری ہزاروں سال پرانی تاریخ جس میں ہم دیہاتوں میں محبت سے رہتے تھے، کو زندہ کیا جائے۔ انہوں نے کہا کہ آج ہم ان لوگوں کی مذمت کرتے ہیں جو آپس میں نفرتیں پیدا کر رہے ہیں۔
انہوں نے کہا کہ ہمیں مذہب سے اوپر اٹھ کر انسانیت کی بنیاد پر ایک دوسرے سے پیش آنا چاہیے۔ ہم یہ پیغام دیتے رہے ہیں اور جب تک زندہ رہیں گے دیتے رہیں گے۔ انہوں نے ہولی ملن پروگرام میں مدعو کرنے پر کرنل راجیو کا بھی شکریہ ادا کیا۔
اس دوران بی جے پی لیڈر کرنل راجیو نے کہا کہ یہ ان کے لیے بڑے فخر کی بات ہے کہ مولانا ارشد مدنی ایک چھوٹی سی دعوت پر ہولی ملن پروگرام میں آئے، کرنل نے کہا کہ اس طرح ایک دوسرے کے تہوار میں شرکت کرنے سے ہی بھائی چارہ بڑھے گا۔ اور دونوں فرقوں کے درمیان نفرت کی فضا پروان چڑھ رہی ہے، اسے بھی دور کیا جا سکتا ہے۔
اس دوران کلدیپ سنگھ پنڈیر، نیرج رانا، راجپال سنگھ، ٹھاکر حکم سنگھ، بلو، اشوک دھیمان، رام بھروس، ببلی سنگھ، دھرم پال سنگھ وغیرہ موجود تھے۔واضح ہو کہ دہلی میں مولانا محمود مدنی کی زیرقیادت جمعیتہ کے اجلاس میں مولاناارشد مدنی کے اوم اللہ اور حضرت آدم و منو کے تعلق سے دیئے گئے بیان سے کئی ہندو تنظیموں میں ناراضگی دیکھی گئی۔