بریلی شریف(نامہ نگار)
ا ترپردیش اسمبلی الیکشن سے قبل کانگریس کی حمایت کرنے والے مولانا توقیر رضا خان کی بہو نے نریندر مودی کی تعریف کی ہے۔ دینک بھاسکر کی خبر کے مطابق مولانا توقیر رضا خان کی بہو ندا خان نے کہاکہ مودی راج میں خواتین محفوظ ہوئی ہیں۔ ندا خان نے کہاکہ ہم زندہ ہیں تو یہ بی جے پی کی دین ہے۔
ندا خان نے اپنے سسر اتحاد ملت کونسل کے چیف مولانا توقیر رضا پر بھی سنگین الزامات عائد کیے ہیں۔ ندا نے کہاکہ جو آدمی اپنے گھر کے معاملات نہیں سلجھا سکا وہ بھلا سماج کےلیے کیا کرے گا۔ندا خان نے نیوز 18سے بات چیت کرتے ہوئے کہاکہ جب تین طلاق کےلیے ہماری لڑائی شروع ہوئی تھی اس وقت تین طلاق ایسی تلوار تھی جو لڑکیوں پر لٹکتی رہتی تھی، اس وقت صرف بی جے پی نے ہمارا ساتھ دیا۔ مولانا نے خوب بیان دیاکہ تین طلاق ہوناچاہئے ۔مولانا نے سوچا ہوتا تو ان کے خاندان میں ہی خواتین کا استحصال نہیں ہوتا وہ صرف فتویٰ جاری کرتے ہیں جس سے خواتین کا استحصال ہوتا ہے۔
ندا خان نے سماج وادی پاری پر بھی سنگین الزامات لگائے ہیں، انہوں نے کہاکہ ایس پی حکومت میں ہمارے اوپر فرضی مقدمات لکھوائے گئے، جب بی جے پی حکومت آئی تو وہ بند ہوا، اب وہ چاہ رہے ہیں کہ بی جے پی حکومت نہ آئے، ندا خان نے کہاکہ 2015 میں ہماری شادی ہوئی تھی، شادی کے کچھ دنوں بعد میرا امتحان تھا، بیچ امتحان سے مجھے لے آئے، انہوں نے کہاکہ وہ نہیں چاہتے تھے کہ ان کے گھر کی خواتین پڑھے، پھر جہیز کےلیے مار پیٹ شروع کردی، سمجھ ہونے کے بعد بھی ان کی لالچ نہیں گئی، پانچ ماہ بعد میرے ساتھ بہت مارپیٹ کی گئی، میں اپنے گھر آگئی جب وہ دوسری شادی کرنے گئے تومیں کورٹ گئی۔ ندا خان نے کہاکہ اس وقت وہ کہتے تھے ایس پی کی حکومت ہے اور ایس پی ہماری جیب میں ہے، جو ہوا عدالت میں ہوا، ایس پی حکومت میں مقدمے نہیں لکھے گئے، بی جے پی حکومت میں مقدمے لکھے گئے۔