نئی دہلی :
میڈیکل کی تعلیم حاصل کرنے کے خواہشمند طلبہ کے لیے اہم حکم جاری کیا گیا ہے ۔ اس میں دیگر پسماندہ ذاتوں ( او بی سی ) اور معاشی طور پر کمزور طبقہ ( ای ڈبلیو ایس ) کے لیے ریزرویشن (میڈیکل کورس ریزرویشن ) لاگو کرنے کااعلان ہوا ہے ۔ اس میں انڈر گریجویٹ اور پوسٹ گریجویٹ میڈیکل ؍ ڈینٹل کور س ( ایم بی بی ایس ؍ ایم ڈی ؍ ایم سی ؍ ڈپلومہ ؍ بی ڈی ایس ؍ ایم ڈی ایس ) کے لیے او بی سی کو 27 فیصد اور ای ڈبلیو ایس کوٹے والے کو 10 فیصد کا ریزرویشن ملے گا۔ اس کا فائدہ آل انڈیا کوٹہ اسکیم ( اے آئی کیو) کے تحت کسی بھی ریاستی سرکار کےزیر انتظام ادارہ سے لیا جا سکتا ہے۔ مرکز کے زیرانتظام انسٹی ٹیویٹ میں یہ پہلے سے لاگو ہے ۔ یہ اسکیم 2021-22کے سیشن سے شروع ہوگی ۔
معلومات کے مطابق تقریباً 5,550 طلبہ کو اس کا فائدہ ملے گا،اس سے ہر سال 1500 او بی سی ( ایم بی بی ایس میں) ، 2500 او بی سی طلبہ کوپوسٹ گریجویشن میں فائدہ ہوگا۔ وہیں ہر سال ایم بی بی ایس میں 550 ای ڈبلیو ایس اور پوسٹ گریجویشن میں 1000 ای ڈبلیو ایس طلبا کو فائد ہو گا۔ بتادیں کہ سرکاری میڈیکل کالج میں موجودہ کل سیٹوں میں سے یو جی (انڈر گریجویٹ ) کی 15 فیصد اور پی جی ( پوسٹ گریجویٹ ) کی 50 فیصد سیٹیں آل انڈیا کوٹے میں آتی ہیں ۔
2007 میں جب مرکزی تعلیمی اداروں (داخلہ میں ریزرویشن) ایکٹ نافذ کیا گیا تو او بی سی کو بھی 27 فیصد کا فائدہ ملنے لگا، لیکن فائدہ فی الحال تک مرکزی تعلیمی اداروں (صفدر جنگ اسپتال ،لیڈی ہارڈنگ میڈیکل کالج، علی گڑھ مسلم یونیورسٹی اور بنارس ہندو یونیورسٹی وغیرہ) میں لاگو تھا۔ اسے اسٹیٹ میڈیکل اور ڈینٹل کالج میں لاگو نہیں کیا گیا تھا ، اب او بی سی طلبہ کو یہ فائدہ ملے گا۔
وزیر اعظم مودی نے لی تھی جائزہ میٹنگ
مرکزی حکومت نے پہلے ہی پسماندہ طبقات اور ای ڈبلیو ایس کو ریزرویشن کا فائدہ دینے کے لیے اپنےعہد کااظہار کرچکی تھی ۔ بتادیں کہ سرکار 2019 میں آئینی ترمیم لائی تھی، اس کے بعد ای ڈبلیو ایس کیٹیگری کے طلبا کو اعلیٰ تعلیم کے لیے ریزرویشن دینے کی بات ہوئی تھی۔ اس میں ای ڈبلیو ایس کو 10 فیصد ریزرویشن دینے کی بات تھی۔ اس کو لاگو کرنے کے لیے پی ایم مودی نے کچھ دن پہلے ہی رویو میٹنگ بھی کی تھی ۔ آل انڈیا کوٹے کے تحت او بی سی کو ریزرویشن دینے کی مانگ طویل عرصہ سے اٹھ رہی تھی۔ پی ایم مودی نے 26 جولائی کو میٹنگ میں اس کا جلد حل نکالنے کی بات کہی تھی۔
بتادیں کہ این ڈی اے کے دیگر پسماندہ طبقات (او بی سی) کے ممبران پارلیمنٹ کے ایک وفد نے بدھ کے روز وزیر اعظم نریندر مودی سے ملاقات کی تھی۔ انہوں نے آل انڈیا میڈیکل ایجوکیشن کوٹہ میں او بی سی اور معاشی طور پر پسماندہ (ای ڈبلیو ایس) زمرہ کے امیدواروں کے لئے بھی ریزرویشن کے نفاذ کا مطالبہ کیا تھا۔