نئی دہلی :(ایجنسی)
دارالحکومت دہلی میں بڑھتے ہوئے کورونا وائرس کے معاملات کو دیکھتے ہوئے ویک اینڈ کرفیو لگانے کا فیصلہ کیا گیا ہے، اس سے پہلے دہلی میں نائٹ کرفیو نافذ تھا، لیکن اب ویک اینڈ پر پورے دن کا کرفیو رہے گا۔
دارالحکومت دہلی میں کورونا کا انفیکشن بڑھتا جا رہا ہے، دہلی کے وزیر اعلیٰ اروند کیجریوال خود بھی کورونا پازیٹیو پائے گئے ہیں۔ کیجریوال نے ٹویٹر پر لکھا – میں کورونا سے متاثر پایا گیا ہوں۔ مجھے ہلکی علامت ہے۔ میں نے اپنے آپ کو گھر پر آئیسولٹ کر رکھا ہے، جو لوگ پچھلے کچھ دنوں میں میرے رابطے میں آئے، براہ کرم خود کو آئیسولٹ کریں اور اپنا ٹیسٹ کرائیں۔
بھارت میں گزشتہ 24 گھنٹوں کے دوران کورونا کے 37,479 نئے کیسز رپورٹ ہوئے، جس سے فعال کیسز کی کل تعداد 1,71,830 ہوگئی۔ یہ اعداد و شمار منگل کو مرکزی وزارت صحت اور خاندانی بہبود نے شیئر کیے ہیں۔ وزارت کے مطابق ملک میں کل مثبت کیسز کی شرح 0.49 فیصد ہے۔ اس کے ساتھ ہی گزشتہ 24 گھنٹوں میں کورونا سے 124 نئی اموات ہوئی ہیں جس سے اموات کی تعداد 4,82,017 ہو گئی ہے۔
دریں اثنا، اومیکرون کے کیسز کی تعداد 1,892 ہو گئی ہے، جن میں سے 766 کو اسپتالوں سے فارغ کر دیا گیا ہے۔ وزارت نے کہا کہ اب تک کم از کم 23 ریاستوں میں اومیکرون کے کیسز درج کیے گئے ہیں، گزشتہ 24 گھنٹوں میں 11,007 مریضوں کے صحت یاب ہونے کی وجہ سے کورونا سے صحت یاب ہونے والوں کی تعداد بڑھ کر 3,43,06,414 ہو گئی ہے۔