چنڈی گڑھ :(ایجنسی)
پنجاب میں اتوار کو اسمبلی کے لیے ووٹنگ ہو رہی ہے۔ صبح 8 بجے شروع ہونے والی ووٹنگ پرامن طور پر جاری ہے ،تاہم الیکشن کمیشن مکمل الرٹ ہے۔ موگا میں الیکشن کمیشن نے فلم اداکار سونو سود کی گاڑی ضبط کر لی۔ سونو سود کی بہن مالویکا
سود موگا سے کانگریس کے ٹکٹ پر الیکشن لڑ رہی ہیں۔ اسی دوران پٹیالہ کی بابو سنگھ کالونی میں اکالی اور کانگریس کارکنوں میں جھڑپ ہوگئی۔ اس دوران ایک شخص زخمی ہوگیا۔
اس کے ساتھ ہی ڈھکولی کے ہمت گڑھ میں وسنت بہار کے لٹل اینجل اسکول میں بنائے بوتھ نمبر 92,93,94میں کانگریس کے ذریعہ بوتھ کیچپرنگ کی اطلاع بھی ہے ۔ وہیں پٹیالہ میں کیپٹن امریندر سنگھ کی بیٹی جے اندر کور اورکانگریس کے سینئر ڈپٹی میئر یوگیندر یوگی کے درمیان کہاسنی ہو گئی۔
ترن تارن میں خاتون ملازم پرلگایا الزام
ترن تارن کے بوتھ نمبر 147 پر کانگریس امیدوار ڈاکٹر دھرم ویر اگنی ہوتری کے حامیوں نے ایک خاتون ملازم پر الزام لگایا کہ وہ لوگوں پر ایک خاص پارٹی کے حق میں ووٹ دینے کے لیے دباؤ ڈال رہی ہیں۔ خاتون ملازم کی ڈیوٹی بوتھ نمبر 147 کے باہر ماسک تقسیم اور سینیٹائز کرنا تھی۔ ڈاکٹر اگنی ہوتری نے کہا کہ خاتون ملازم کی شکایت ایس ڈی ایم سے کی گئی ہے اور وہاں سے اسے تبدیل کرنے کا مطالبہ کیا گیا ہے۔
موہالی میں ماحول گرم
موہالی کے فیز 4 میں صبح اس وقت ماحول گرم ہو گیا جب ووٹروں کے گھر فریج وغیرہ پہنچنے لگے ۔ کانگریس امیدوار بلویر سنگھ موقع پر پہنچے ۔ لوگوںنے پولیس کو بھی بلایا لیا۔ ان کاالزام تھا کہ فریج آپ کے امیدوار کلونت سنگھ کےذریعہ تقسیم کئے جارہےہیں۔ پولیس نے سامان قبضے میں لے کر جانچ شروع کردیہے ۔
بی جے پی امیدوار کے بیٹے پر انتخابی ضابطہ اخلاق کی خلاف ورزی کا مقدمہ درج
بی جے پی امیدوار اور سابق کابینی وزیر رانا گرمیت سوڈھی کے بیٹے رگھومیت سوڈھی رات گئے کچھ دیگر لوگوں کے ساتھ فیروز پور کے سرحدی علاقوں میں انتخابی مہم چلا رہے تھے۔ ان کے خلاف انتخابی ضابطہ اخلاق کی خلاف ورزی کا مقدمہ درج کیا گیا ہے۔