پریاگ راج ( ایجنسی)
باگھمبری مٹھ کے مہنت نریندر گری کی موت کا معمہ سلجھانے کی ذمہ داری اب سی بی آئی کو دی گئی ہے۔ ان کی موت پر بنے راز سے پردہ کب اٹھ پائے گا اس بات کا پتہ توجانچ کے دوران ہی چلےگا، لیکن سنت سماج کاایک بڑا دھڑا یہ مانتا ہے کہ مہنت نریندر گری کا قتل ہواہے ۔ اپنی دلیل کی تائید میں مہنتوںکا کہناہے کہ مہنت نریندر گری کو لکھنا نہیں آتا تھا تو 13 صفحات پرمشتمل سوسائڈ نوٹ کا سوال ہی نہیں اٹھتا ہے ۔ وہی ان کے کچھ شاگردوں کا دعویٰ ہے کہ مہنت نریندر گری 10 ویں تک پڑھے ہوئے تھے اور انہیں پڑھنا لکھنا آتا تھا۔”
اس مبینہ سوسائڈ نوٹ میں مہنت نریندر گری نے اپنے وصیت ناموں کے علاوہ اپنے شاگرد آنند گری سمیت تین لوگوں پر سنگین الزامات لگائے ہیں۔ سوسائڈ نوٹ میں ایک قابل اعتراض فوٹو کاذکر ہے ،لکھا گیا ہے کہ کمپیوٹر سے چھیڑ چھاڑ کرکے یہ تصویر بنائی گئی اور آنند گری اسے ہی عوامی کرنے والا تھا۔ ایک قابل اعتراض ویڈیو سے بلیک میل کئے جانے کی بات بھی ذرائع کرتےہیں ۔ اس مبینہ بلیک میل کے پیچھے ان کے شاگرد آنند گری کا نام سب سے اوپر آرہا ہے، جنہیں پولیس نے گرفتار کر لیا ہے ۔ مہنت نریندر گری کے ذاتی سیکورٹی گارڈ ،کچھ مقامی لیڈر اور پولیس والے بھی جانچ کے دائرے میں آگئے ہیں جن سے پریاگ راج پولیس نے پوچھ گچھ بھی کی ہے لیکن پولیس ابھی تک سچائی کی تہہ تک نہیں پہنچ پائی ہے ۔
مہنت نریندر گری اور ان کے شاگرد آنند گری کے رشتے میں بہت پہلے سے ہی درار آگئی تھی جب دونوں نے ایک دوسرے کےاوپر کئی الزام لگائے تھے۔ آنند گری نے اپنے گرو کے اوپر مٹھ کی زمین بیچنے سے لے کر 2019 میں نرنجنی اکھاڑے کے سکریٹری کو قتل تک کاالزام لگایا تھا ۔ بعد میں سنتوں کی ثالثی کے بعد آنند گری نے اپنے گرو سے معافی مانگی تھی لیکن ان دونوں کے رشتوں میں تناؤ ختم نہیں ہوئے تھے ۔ ایک وقت نریندر گری کے جانشین مانے جانے والے آنند گری اس وقت جیل میں ہے ۔
اب مسئلہ مہنت نریندر گر کی جانشینی کا بھی ہے۔ اپنے مبینہ سوسائڈ نوٹ میں مہنت نریندر گری نے اپنے شاگرد بلویر گری کو اپنا جانشین بنادیا ہے ، لیکن مہنت سماج کا ایک طبقہ انہیں اپنا جانشین ماننے کو تیار نہیں ہے۔ باگھمبری گڈی مٹھ کا اگلا مہنت کون ہوگا اس کے بارے میں منتھن شروع ہوگیا ہے اور آنے والے وقت میں یہ دیکھنا دلچسپ ہوگا کہ کیا بلویر گری کو جانشین قرار دیا جائے گا یا اس کے بارے میں بھی گھمسان ہوگا۔ جانشینی کا مسئلہ روحانیت کے علاوہ جائیداد ، زمین اور پیسے سے جڑا ہے ، ایسی صورت حال میں اگر دوبارہ ہنگامہ ہوا تو مٹھ اور سادھو سنتوں کی ساکھ پر پھر بھٹہ لگے گا۔ ویسے بھی مہنت نریندر گری کی موت کے پیچھے جن چیزوں کا ذکر ہو رہاہے ان سے کم سے کم سنیاس کو تو جوڑ کر نہیں دیکھا جا سکتا۔