سپریم کورٹ کے حکم کے بعد، اسٹیٹ بینک آف انڈیا (ایس بی آئی) نے جمعرات (21 مارچ) کو تمام انتخابی بانڈز سے متعلق الفا نیومیرک کوڈ کا ڈیٹا الیکشن کمیشن کو سونپ دیا، جس کے بعد الیکشن کمیشن نے ڈیٹا کو اپنی ویب سائٹ پر شائع کیا ہے۔
الیکٹورل بانڈ کے منفرد نمبر کے آنے کے بعد اب یہ آسانی سے معلوم ہو سکتا ہے کہ یہ بانڈ کس نے کتنے میں خریدا اور کس نے چھڑایا۔ یعنی اب کس پرائیویٹ کمپنی نے کس پارٹی کو کتنا عطیہ دیا اس کی معلومات بھی عام ہوگئی ہیں۔ اب تک کے اعداد و شمار کے مطابق، مرکز میں حکمراں جماعت بھارتیہ جنتا پارٹی کو 8700 کروڑ روپے سے زیادہ کے الیکٹورل بانڈز ملے ہیں، جو دیگر تمام جماعتوں کے کل عطیات سے زیادہ ہیں۔ لیکن یہ دینے والے کون ہیں، آئیے آپ کو اس مضمون میں بتاتے ہیں۔
بی جے پی کو الیکٹورل بانڈ دینے والی ٹاپ 10 کمپنیاں کون ہیں؟
حیدرآباد کی میگھا انجینئرنگ اینڈ انفراسٹرکچر بی جے پی کو سب سے زیادہ چندہ دینے والی کمپنیوں کی فہرست میں پہلے مقام پر ہے جس نے پارٹی کو 584 کروڑ روپے کا عطیہ دیا ہے۔ دوسرے نمبر پر کوئیک سپلائی چین پرائیویٹ لمیٹڈ ہے، جس نے پارٹی فنڈ میں 375 کروڑ روپے کا عطیہ دیا ہے۔ معلومات کے مطابق، اس کمپنی نے ایک ہی دن میں بی جے پی کو سب سے زیادہ چندہ دیا ہے۔ تیسرے نمبر پر کان کنی کی بڑی کمپنی ویدانتا لمیٹڈ ہے، جس نے بی جے پی کو 230 کروڑ روپے کا عطیہ دیا ہے۔ چوتھے نمبر پر ٹیلی کام کمپنی بھارتی ایئرٹیل لمیٹڈ ہے جس نے 197 کروڑ روپے دیے ہیں۔ پانچویں نمبر پر، مدن لال لمیٹڈ نے 175 کروڑ روپے کا عطیہ دیا ہے، جبکہ چھٹے نمبر پر، ڈی ایل ایف گروپ نے بی جے پی کو 170 کروڑ روپے کا عطیہ دیا ہے۔ ساتویں نمبر پر Keventer Foodpark Infra Limited ہے جس نے 144 کروڑ روپے دیے ہیں۔ برلا کاربن انڈیا پرائیویٹ لمیٹڈ 105 کروڑ روپے دے کر آٹھویں نمبر پر ہے اور فیوچر گیمنگ اینڈ ہوٹل سروس نویں نمبر پر ہے جس نے 100 کروڑ روپے دیے ہیں۔
وہیں، ہلدیہ انرجی لمیٹڈ دسویں نمبر پر ہے۔ کمپنی نے بی جے پی کو 81 کروڑ روپے کا عطیہ دیا ہے۔
دلچسپ بات یہ ہے کہ یہ کمپنیاں کسی نہ کسی معاملے میں مرکزی تفتیشی ایجنسی انفورسمنٹ ڈائریکٹوریٹ، انکم ٹیکس اور سی بی آئی کے رڈار پر تھیں۔ تفتیشی اداروں نے ان کے خلاف کارروائی بھی شروع کر دی تھی۔
نوٹ: 466 کروڑ روپے کے بی جے پی بانڈز کے خریدار کے بارے میں کوئی معلومات نہیں ہے۔
(بشکریہ دی کوئنٹ)