نئی دہلی :(ایجنسی)
کانگریس جنرل سکریٹری پرینکا گاندھی واڈرا نے منگل کو اتر پردیش کی بی جے پی حکومت پر شدید حملہ بولا۔ انہوں نے کہا کہ ضرورت اس بات کی ہے کہ الیکشن صرف ترقی کے ایشوز پر لڑے جائیں۔ کانگریس نے اتر پردیش میں غلط راستہ اختیار کرنے سے انکار کر دیا ہے۔ پرینکا نے کہا کہ خواتین کو ایک الگ سیاسی بقاء کے طور پر ووٹ کرنا چاہیے، یہ وقت اپنے حقوق کو سمجھنے اور سیاست کے میدان میں اپنے جائز مقام کا مطالبہ کرنے کا ہے۔
بھارتیہ جنتا پارٹی (بی جے پی) اور سماج وادی پارٹی (ایس پی) پر تنقید کرتے ہوئے، پرینکا نے کہا کہ دونوں پارٹیاں پولرائزیشن کو پسند کرتی ہیں کیونکہ اس سے ان کا ووٹ بینک مضبوط ہوتا ہے۔ انہوں نے کہا کہ بی جے پی کو پولرائزیشن کا فائدہ اٹھانے سے روکنے کے لیے ریاست کے لوگوں کو الگ طرح کی سیاست کا متبادل دینے کی ضرورت ہے۔ گورکھپور سے انتخاب لڑنے والے یوگی آدتیہ ناتھ کے بارے میں گاندھی نے کہا کہ مجھے لگتا ہے کہ بی جے پی قیادت ان کا قد کم کرنا چاہتی ہے۔
پرینکا گاندھی واڈرا نے کہا کہ بی جے پی کا یہ اقدام اشارہ کرتا ہے کہ اس کی قیادت یوگی آدتیہ ناتھ کے قد کو کم کرنا چاہتی ہے کیونکہ ان کے آمرانہ نظام میں صرف ایک سپریم لیڈر ہو سکتا ہے۔ واضح رہے کہ بی جے پی نے 15 جنوری کو اعلان کیا تھا کہ وزیر اعلیٰ یوگی آدتیہ ناتھ گورکھپور شہری اسمبلی سیٹ سے الیکشن لڑیں گے۔ پہلے یہ بحث تھی کہ آدتیہ ناتھ کو ایودھیا سے امیدوار بنایا جا سکتا ہے، لیکن پارٹی قیادت نے ایسا نہیں کیا۔
‘# بی جے پی حکومت لوگوں کو بچانے میں ناکام
انہوں نے ریاستی حکومت پر کووڈ وبا کے دوران بدانتظامی کا الزام لگایا۔ انہوں نے کہا کہ یہ حکومت عوام کو بچانے میں ناکام رہی ہے۔ چاہے وہ آشا بہو ہوں یا ڈاکٹر، نرسیں ہوںیا دیگر ہیلتھ ورکرز، کورونا بحران کے دوران اپنی پرواہ نہ کرکے کام کرنے والے ایسے لوگوں کی حوصلہ افزا ئی کرنے کے بجائے بی جےپی نےڈر کا ماحول پیدا کیا۔ انہوں نے کہاکہ بی جے پی سرکارلوگوں کی جان بچانےکی جگہ پر صرف سچائی کو چھپانے کی کوششیں کرتی رہی۔
دریں اثناء پرینکا گاندھی نے کہا، ’خبروں کے مطابق لکھیم پور میں تھارو قبیلہ کے ایک نوجوان کا پولیس حراست میں پیٹ پیٹ کر قتل کر دیا گیا۔ آگرہ میں ارون والمیکی، غازی پور میں نریندر پاسوان جیسے کئی معاملوں میں یوپی حکومت کی پولیس نے آئین اور قانون کے راج کو روندتے ہوئے ظلم و ستم کا راج قائم کیا۔‘
انہوں نے مزید لکھا، ’یوپی کے عوام ان 5 سالوں کا حساب مانگنے کے لئے تیار ہیں۔ یوپی کے عوام آئین کی حفاظت کے لئے تیار ہیں، جوکہ عوام کی حفاظتی ڈھال ہے۔ بی جے پی حکومت نے اس حفاظتی ڈھال کو تہس نہس کیا ہے۔‘