نئی دہلی:(ایجنسی)
ہندوستانی فضائیہ نے اتوار کو ’اگنی پتھ‘ اسکیم کے ذریعے کی جانے والی نئی بھرتیوں کی تفصیلات جاری کیں۔ یہ تفصیلات ایک ایسے وقت میں جاری کی گئی ہیں جب ملک بھر میں نوجوان بحالی کے نئے عمل کو واپس لینے کے لیے پرتشدد احتجاج کر رہے ہیں۔ فضائیہ کی طرف سے جاری کردہ ریلیز میں سروس سے متعلق تمام معلومات دی گئی ہیں۔ اس میں بتایا گیا ہے کہ اگنی پتھ اسکیم کے تحت فوج میں شامل ہونے والے امیدوار کی اہلیت کیا ہونی چاہیے، ان کی یونیفارم کیا ہوگی، ان کی تنخواہ کیا ہوگی، انہیں کتنی چھٹی ملے گی اور ان کی ٹریننگ کیسی ہوگی۔ اس کے علاوہ بھی بہت سی معلومات دی گئی ہیں۔ تاکہ نوجوان حکومت کے نئے بحالی پلان کو سمجھ سکیں۔
اگنی ویر یوجنا کے تحت، کوئی بھی ہندوستانی نوجوان جس کی عمر 17.5 سے 21 سال کے درمیان ہے درخواست دے سکتا ہے۔ انہیں پہلے سے طے شدہ میڈیکل ٹیسٹ سے گزرنا پڑے گا۔ اگنی ویر دیگر فضائیہ کے اہلکاروں کو دیے جانے والے تمغوں اور ایوارڈز کے لیے بھی اہل ہوں گے۔ اس کے علاوہ، انہیں ایک سال میں 30 پیڈ لیو ملیں گے ۔ جبکہ میڈیکل لیو طبی مشورے کے مطابق دی جائے گی۔
ٹریننگ کے دوران انہیں سرکاری صحت کی خدمات حاصل ہوں گی۔ تاہم، انہیں خصوصی حالات کے علاوہ ٹریننگمدت کے وسط میں سروس چھوڑنے کی اجازت نہیں ہوگی۔ اگنی پتھ اسکیم کے تحت، اسے سروس کے پہلے سال کی تنخواہ کے طور پر 30 ہزار روپے ملیں گے، جس میں سے 21 ہزار براہ راست ان کے اکاؤنٹ میں جائیں گے اور 9000 ہزار روپے اگنی ویر کور فنڈ میں جائیں گے۔ تنخواہ ہر سال بڑھے گی۔ تربیت کے آخری سال میں اگنی ویر کی تنخواہ 40 ہزار روپے ہوگی۔
ساتھ ہی چار سال کی ٹریننگ کے بعد جب 75 فیصد اگنی ویر ریٹائر ہوں گے تو انہیں سروس فنڈ کے تحت 10 لاکھ چار ہزار روپے دیے جائیں گے جس میں پانچ لاکھ دو ہزار روپے ان کی اپنی کمائی کی ہوگی۔ اس کے علاوہ انہیں حکومت کی طرف سے کسی قسم کی گریجویٹی یا دیگر فنڈ نہیں ملے گا۔ تاہم، وہ ٹریننگ مدت کے دوران 48 لاکھ روپے کا لائف انشورنس حاصل کریں گے ۔