نئی دہلی(ایجنسی)
کانگریس کے سابق صدر راہل گاندھی نے تینوں زرعی قوانین کو واپس لینے کے حکومت کے اعلان کو ناانصافی کی شکست قرار دیتے ہوئے کسانوں کو جیت کی مبارکباد دیتے ہوئے کہا کہ ان داتا کے ستیہ گرہ کے سامنے غرور کا سر جھکا ہے۔
راہل گاندھی نے ٹویٹ کیا ’’ملک کے ان داتا نے ستیہ گرہ سے غرور کا سر جھکا دیا۔ ناانصافی کے خلاف اس جیت پر مبارکباد! جئے ہند، جئے ہند کا کسان۔‘‘
راہل گاندھی نے اپنے ٹوئٹ کے ساتھ اپنی ایک پرانی ویڈیو بھی شیئر کی ہے جس میں وہ کسانوں کے ساتھ یکجہتی کا اظہار کرتے ہوئے کہہ رہے ہیں کہ میری یہ بات یاد رکھنا کہ حکومت کو ایک دن زرعی قوانین کو واپس لینے پر مجبور ہونا پڑے گا۔
دریں اثنا، کانگریس لیڈر ملکارجن کھڑگے نے زرعی قوانین کی واپسی کو کسانوں کی جیت قرار دیا اور کہا کہ یہ ان کسانوں کی جیت ہے جو کافی دنوں سے زرعی قوانین کے خلاف سراپا احتجاج بنے ہوئے تھے، 700 سے زیادہ کسانوں کی موت ہو گئی۔ یوں محسوس ہوتا ہے کہ مرکز احساس جرم کا شکار ہے۔ لیکن اس دوران کسانوں کو جن مشکلات کا سامنا رہا اس کی ذمہ داری کون لے گا؟ ہم ان مسائل کو پارلیمنٹ میں اٹھائیں گے۔
انتخابات میں ہار ہوئی تو سچائی نظر آنے لگی، پرینکا گاندھی کا بیان
کانگریس کی جنرل سکریٹری پرینکا گاندھی واڈرا نے جمعہ کے روز وزیر اعظم نریندر مودی کے تین مرکزی زرعی قوانین کو منسوخ کرنے کے اعلان کے بعد کہا کہ انتخابات میں شکست کے پیش نظر وزیر اعظم سچائی کو سمجھنے لگے ہیں لیکن ان کی نیت اور بدلتے ہوئے رخ پر یقین کرنا مشکل ہے۔پرینکا گاندھی نے ٹویٹ کیا،’’600 سے زیادہ کسانوں کی شہادت، 350 سے زیادہ دنوں کی جدوجہد، نریندر مودی جی آپ کے وزیر کے بیٹے نے کسانوں کو کچل کر موت کے گھاٹ اتار دیا، آپ کو پرواہ نہیں تھی۔ آپ کی پارٹی کے لیڈر کسانوں کی توہین کرتے ہوئے انہیں دہشت گرد، غدار، غنڈے، شرپسند کہا، آپ نے خود انہیں ’آندولن جیوی‘ قرار دیا۔‘‘انہوں نے مزید کہا، ’’کسانوں پر لاٹھیاں برسائیں، انہیں گرفتار کر لیا۔ اب جب آپ کو انتخابات میں شکست نظر آنے لگی تو اچانک آپ کو اس ملک کی حقیقت سمجھ میں آنے لگی کہ اس ملک کو کسانوں نے تعمیر کیا ہے، یہ ملک کسانوں کا ہے، کسان ہی اس ملک کا اصل نگران ہے اور کوئی نہیں! حکومت کسانوں کے مفادات کو روند کر اس ملک کو نہیں چلا سکتی۔ وزیر اعظم پر نشانہ لگاتے ہوئے انہوں نے کہا کہ آپ کے ارادوں اور آپ کے بدلتے رخ پر یقین کرنا مشکل ہے۔ کسان کی ہمیشہ جے ہوگی، جئے جوان، جئے کسان، جئے بھارت۔