لکھنؤ؍مین پوری :(ایجنسی)
مین پوری کی کرہل اسمبلی سیٹ کا انتخاب کافی دلچسپ ہو گیا ہے۔ ایس پی سربراہ اکھلیش یادو نے اس سیٹ سے الیکشن لڑنے کا فیصلہ کیا تو بی جے پی نے ایس پی سنگھ بگھیل کو میدان میں اتاردیا، اکھلیش کےساتھ بگھیل نے آج اپناپرچہ نامزدگی داخل کیا۔ کرہل مین پوری پارلیمانی حلقہ کاایک حصہ ہے۔ اس کی نمائندگی سماج وادی پارٹی کے بانی ملائم سنگھ یادو کرتےہیں۔
سماج وادی پارٹی کے صدر اور اتر پردیش کے سابق وزیر اعلیٰ اکھلیش یادو نے پیر کو مین پوری ضلع کی کرہل اسمبلی سیٹ سے اتر پردیش اسمبلی انتخابات کے لیے اپنا پرچہ نامزدگی داخل کرنے سے پہلے کہا کہ یہ نامزدگی ایک مشن ہے۔ یہ الیکشن ریاست اور ملک کی اگلی صدی کی تاریخ لکھے گا۔
اکھلیش نے کہا کہ نیتا جی اور سماج وادی پارٹی کا یہاں سے بہت پرانا رشتہ ہے اور یہاں کے لوگوں نے سماج وادی پارٹی کے ساتھ کھڑے ہو کر ایک مثبت سیاست کو آگے بڑھایا ہے۔ مجھے امید ہے کہ جو لوگ اس الیکشن میں منفی سیاست کریں گے، لوگ انہیں اترپردیش سے نکال دیں گے۔ انہوں نے اپنی پرجوش اپیل میں کہا کہ میں یہ الیکشن عوام پر چھوڑتا ہوں، کیونکہ مجھے کسی اور جگہ جانا ہے۔
وہیں پروفیسر ایس پی سنگھ بگھیل اتر پردیش کے اوریا ضلع کے بھٹ پورہ کے رہنے والے ہیں۔ بگھیل جو کبھی اترپردیش پولیس میں سب انسپکٹر کے طور پر تعینات تھے، 1989 میں ملائم سنگھ یادو کی سیکورٹی میں شامل ہوئے جب وہ وزیر اعلیٰ بنے تھے۔ بگھیل سے متاثر ملائم سنگھ یادو نے انہیں پہلی بار 1998 میں جلیسر سیٹ سے سماج وادی پارٹی کے امیدوار کے طور پر میدان میں اتارا تھا۔ یہ الیکشن جیتنے کے بعد وہ دو بار ایم پی منتخب ہوئے۔ 2010 میں بی ایس پی نے انہیں راجیہ سبھا بھیجا تھا۔
2014 میں، بگھیل نے راجیہ سبھا سے استعفیٰ دے دیا اور بی جے پی میں شمولیت اختیار کی۔ 2017 میںٹنڈلہ ریزرو سیٹ سے بی جے پی کے ایم ایل اے بنے۔ اس کے بعد انہیں وزیر اعلیٰ یوگی آدتیہ ناتھ کی ٹیم میں شامل کر لیا گیا۔2017 کے لوک سبھا انتخابات میں بی جے پی نے انہیں آگرہ لوک سبھا حلقہ سے ٹکٹ دیا تھا۔ یہاں سے جیت کر وہ مرکزی وزیر بن گئے۔
اکھلیش کےلیے مفید ہے کرہل کی سیٹ
کرہل سیٹ اپنے قیام کے بعد سے ہی سماج وادی پارٹی کا گڑھ رہی ہے۔ پارٹی تین دہائیوں سے اس نشست پر قابض ہے۔ یہاں 38 فیصد یادو ہیں۔ کرہل اسمبلی حلقہ میں تقریباً 3 لاکھ 71 ہزار ووٹر ہیں۔ اس میں یادو ووٹروں کی تعداد تقریباً 1 لاکھ 44 ہزار ہے۔ 2017 میں کرہل اسمبلی میں کل 49.57 فیصد ووٹ ڈالے گئے تھے۔ ایس پی کے سبرن سنگھ یادو کو یہاں 1 لاکھ 4 ہزار 221 ووٹ ملے تھے۔ اس کے ساتھ ہی 65 ہزار 816 لوگوں نے بی جے پی کے راما شاکیہ کو ووٹ دیاتھا۔ تیسرے نمبر پر بی ایس پی کیے دلویر رہے، جنہیں 29 ہزار 676 ووٹ ملے تھے۔