رائے بریلی :(ایجنسی)
سماج وادی پارٹی کے سربراہ اکھلیش یادو نے رائے بریلی میں ہفتہ کو لکھنؤ اور مؤ میں ایس پی لیڈروں کے گھروں پر چھاپوں پر کہا کہ یہ سب انتخابات سے پہلے جان بوجھ کر کیا گیا ہے۔ یہ سب کچھ پہلے بھی ہو سکتا تھا، لیکن الیکشن سے پہلے کی یہ کارروائی ظاہر کرتی ہے کہ بی جے پی حکومت تعصب کے ساتھ کام کر رہی ہے۔ اتر پردیش کے لوگ اب یہ بات سمجھ چکے ہیں۔
اکھلیش یادو نے کہا کہ جیسے جیسے الیکشن آئیں گے، دہلی سے بڑے بڑے لیڈر اترپردیش آئیں گے۔ انہوں نے کہا کہ انکم ٹیکس والے بھی یہاں الیکشن لڑنے آگئے ۔ ابھی تو ای ڈی اور سی بی آئی بھی آئے گی۔ ہم پہلے ہی ان سب کا انتظار کر رہے تھے۔ اکھلیش نے کہا کہ میں نے پہلے بھی کہا تھا کہ الیکشن سے پہلے ای ڈی، انکم ٹیکس اور سی بی آئی آئیں گے۔
حکومت کے فیصلوں سے عوام پر بحران آیا
اکھلیش یادو نے کہا کہ بی جے پی حکومت کے فیصلوں سے عوام پر بحران آیا ہے۔ اس حکومت نے صرف عوام کو پریشان کیا ہے۔ انہوں نے کہا کہ بھارتیہ جنتا پارٹی کانگریس کے راستے پر چل رہی ہے۔ کانگریس کی پرانی تاریخ پر ایک نظر ڈالیں، جب بھی ڈرانا ہوتاتھا تو انہی ایجنسیوں کا استعمال کرکے ڈرایا جاتا تھا۔ انہوںنے کہا کہ بی جےپی سرکار نے عوا م کو پریشان کیاہے، لیکن اب عوام نے فیصلہ کرلیا ہے کہ بی جے پی کا خاتمہ کرنا ہے ۔
بی جے پی تعصب کے ساتھ کام کرتی ہے
ایس پی سپریمو نے کہا کہ بی جے پی کہہ رہی تھی کہ ہم رام راجیہ لائیں گے۔ لیکن جو سماج وادی کا راستہ ہے ، وہی رام راجیہ لگائے گا۔ اگر سماج واد آجائے تو وہی رام راجیہ ہے۔ اکھلیش نے کہاکہ بغیر سماج واد آئے رام راجیہ نہیں آسکتا۔ ایس پی سپریمو اکھلیش یادو نے کہا کہ بی جے پی سرکار تعصب کے ساتھ کام کرتی ہے۔ اس سرکار کے دوراقتدار میں کسانوںکا مسلسل توہین کی جاتی رہی ہے۔ کسان تحریک کو لگاتار کچلنے کی کوشش کی۔ یوپی کے عوام تبدیلی کے لیے تیار ہیں۔
وارانسی میں اکھلیش یادو نے گنگا میں ڈوبکی نہیں لگانے پر اکھلیش یادونے طنز کرتے ہوئے کہاکہ ہمارے سی ایم کو معلوم تھا کہ ماں گنگا کی صفائی نہیں ہوئی ہے، اس لئے انہوں نےڈوبکی نہیں لگائی۔ انہوں نے کہاکہ سی ایم جانتے ہیں کہ جمنا اورگومتی کا گندا پانی گنگا میں جا رہا ہے ۔