ممبئی :
کووڈبحران پر انتظامات کو لے کر مرکزی سرکار سوالوں کے گھیرے میں ہے۔ اس درمیان وزیر اعظم نریندر مودی کے اندھ بھکت مانے جانے والے بالی ووڈ اداکار انوپم کھیر نے بھی کووڈ 19-بحران پر کنٹرول کرنے کے معاملے میں مرکزی سرکار پر سخت تبصرہ کیا ہے ۔ انہوں نے کہاکہ انہیں لگتاہے کہ کووڈ بحران میں سرکار ’ پھسل‘ گئی اور اسے ذمہ دار ٹھہرانا ضروری ہے۔ 66 سالہ اداکار انوپم کھیر کا یہ تبصرہ بے حد اہم سمجھاجا رہا ہے۔ بتادیں کہ ان کی بیوی کرن کھیر بی جے پی ممبر پارلیمنٹ ہیں۔
این ڈی ٹی وی کو دئے گئے ایک انٹرویو میں انہوں نے کہا کہ ‘کہیںنہ کہیں لڑکھڑا گئے… یہ وقت ان کے لیے اس بات کو سمجھنے کی ہے کہ شبیہ بنانے کے علاوہ بھی زندگی میں اور بھی بہت کچھ ہے۔ انٹرویو میں انوپم کھیر سے پوچھاگیا کہ کیا سرکار کی کوشش اپنی شبیہ بنانے کے بجائے امداد پہنچانے پر توجہ مرکز ہونا چاہئےتھا اور کووڈ 19-سے متاثرہ پریوار کے اسپتال بستر کے لیے گڑگڑاتے ، لاشوں کو ندی میں بہتیں اور مریضوں کو جد وجہد کرتے ہوئے دیکھنا انہیں کیسا محسوس ہوا؟
اس سوال پر بالی ووڈ کے اس اداکار نے کہا کہ ‘مجھے لگتاہے کہ زیادہ تر معاملوں میں تنقید جائز تھی اور سرکار کے لیے یہ اہم ہے کہ وہ ایسا کام کرے جس کے لیے لوگوں نے انہیں منتخب کیا ہے۔ مجھے لگتا ہے کہ صرف غیر سنجیدہ شخص ہی ایسے حالات سے متاثر ہوگا، بہتی ہوئی لاش، مگر دوسری سیاسی پارٹیوں کیلئے اسے فائدہ کے لیے استعمال کرنا بھی مناسب نہیں ہے۔
انہوں نے کہا کہ ‘بحیثیت شہری ہمیں ناراض ہونا چاہئے … یہ ضروری ہے کہ جو کچھ بھی ہوا اس کےلیے حکومت کو جوابدہ ہونا چاہئے۔ ‘
بتادیں کہ فلمی اداکار انوپم کھیر کورونا بحران کے وقت آگے آئے ہیںاور انہوں نے کورونا کے مریضوں کی فری میں خدمت کرنے کا ذمہ اٹھایا ہے۔ کورونا وبا کی دوسری لہر ملک بھر میں قہر برپا کررہی ہے ۔ بالی ووڈ کے کئی اسٹارز ضرورت مند لوگوں کی مدد کے لیے بھی ہاتھ بڑھا رہے ہیں۔ انوپم کھیر بھی لوگوں کی مدد کے لیے آگے آئے ہیں ۔ انوپم کھیر نے کورونا کے مریضوں کی فری میں خدمت کرنے کا ذمہ اٹھایا ہے۔ انوپم کھیر علاج سے متعلق چیزیں اسپتالوں میں بلا معاوضہ دستیاب کرارہے ہیں۔اس میں’ انوپم کھیر فاؤنڈیشن‘ کے علاوہ 2 اور فاؤنڈیشن مدد کررہے ہیں۔
انوپم کھیر فاؤنڈیشن نے اس کام کوامریکہ کے ‘’گلوبل کینسر فاؤنڈیشن‘ اور ملک میں واقع ’بھارت فورج‘ کے اشتراک سے شروع کیا ہے۔ وہ اسپتالوں اور ایمبولینس کو آکسیجن کنٹریٹرس ، وینٹی لیٹرز ، بیگ پیک آکسیجن مشین ، ٹرانسپورٹ وینٹی لیٹرز اور لائف سیونگ چیزوں کو فری ڈیلیوری کررہے ہیں ۔ انوپم کھیر نے سوشل میڈیا پر ایک ویڈیو شیئر کرکے اس بات کی جانکاری دی ہے۔
انوپم کھیر نے ویڈیو میں بتایا کہ کورونا سے لڑنے کے لئے ہم ملک کے الگ الگ حصوں میں مریضوں کے لیے ضروری سامان اسپتالوں میں پہنچارہے ہیں۔ ہمارا فاؤنڈیشن مہاراشٹر ، بہار ، جموں و کشمیر سمیت متعدد ریاستوں کے شہروں میں سہولت مہیا کرائے گا۔ساتھ ہی ضرورت پڑنے پر کورونا متاثرین کے لیے ایک ہیلپ لائن نمبر بھی شروع کریں گے ۔ اس ہیلپ لائن نمبر کے ذریعہ ماہر نفسیات اور ماہر ڈاکٹر زکورونا مریضوں اور ان کے لواحقین سے بات کریں گے اور انہیں ذہنی تناؤ سے باہر نکالنے میں مدد کریں گے۔