کولکاتا: مغربی بنگال اسمبلی انتخابات میں ممتا بنرجی کی پارٹی ترنمول کانگریس شاندار کامیابی کی طرف گامزن ہے۔ ٹی ایم سی 200 سے زیادہ نشستوں پر آگے چل رہی ہے۔ جیت درج کرنے کے بعد ممتا بنرجی نے آج بھارتیہ جنتا پارٹی پر حملہ بولا۔ ممتا بنرجی نے کہا کہ مرکز کی تمام کوششوں کے باوجود لینڈ سلائیڈ جیت حاصل کی ہے۔ یہ بنگال کے عوام کی جیت ہے۔ بنگال کے عوام نے ملک کو بچایا ہے۔ میں نے کہا تھاکہ ہم ڈبل سنچری لگائیں گے۔ اس جیت نے بنگال کے عوام کو بچالیا۔ ہم نے کہاتھا کہ’ ‘کھیلا ہووبے‘ اور آخر میں ہماری جیت ہوئی۔
نیوز ایجنسی اے این آئی کے مطابق ممتا بنرجی نے کہا کہ ہم اس تاریخی فتح پر عوام کے مشکور ہیں۔ میں فوری طور پر کووڈ کی سمت میں کام شروع کروں گی۔حلف برداری کی تقریب موجودہ صورت حال کی وجہ سے لوپروفائل ایونٹ ہوگا۔
نندی گرام کے بارے میں ممتا بنرجی نے کہا کہ نندی گرام کے بارے میں فکر مت کیجئے ۔ نندی گرام کے عوام جو بھی فیصلہ کریں گے میں اسے قبول کروں گی۔ مجھے کوئی اعتراض نہیں ہے۔ ہم 221 سے زیادہ سیٹیں جیت رہے ہیں اور بی جے پی انتخاب ہار گئی ہے۔
نندی گرام میں ممتا بنرجی اور بی جے پی امیدوار شوبیندو ادھیکاری کے بیچ کانٹے کی ٹکر دیکھنے کو ملی۔ کاؤنٹنگ کی شروعات میں وزیر اعلیٰ بنرجی شوبیندو ادھیکاری سے پچھے ہوگئی تھیں، حالانکہ دوپہر کو انہوں نے 1,200ووٹو ں سے ادھیکاری پر سبقت بنالی تھی ۔ آخری مرحلے کو لے کر اب تک تذبذب بنا ہوا ہے۔ حالانکہ کچھ رپورٹوں میں کہاگیا ہے کہ ممتا بنرجی نندی گرام کی جنگ جیت گئی ہیں ۔
دوسری جانب مغربی بنگال اسمبلی انتخابات کی سب سے ہائی پروفائل سیٹ نندی گرام کے نتیجہ پر تنازع ہوگیا ہے ۔ بھارتیہ جنتا پارٹی کے لیڈر امت مالویہ نے ٹویٹ کرکے بی جے پی امیدوار شوبیندو ادھیکاری کی جیت کا اعلان کردیا ، حالانکہ اس اعلان کے بعد تنازع شروع ہوگیا ہے اور ٹی ایم سی جواب میں ٹویٹ کرتے ہوئے کہا کہ ابھی ووٹوں کی گنتی جاری ہے اور اس پر کوئی قیاس آرائی نہیں کی جائے ۔
اس درمیان ممتا بنرجی نے کچھ دیر پہلے ایک پریس کانفرنس میں کہا کہ انہیں نندی گرام کا فیصلہ منظور ہے ۔ ان کے اس بیان کے کچھ دیر بعد ہی ٹی ایم سی کے آفیشیل ٹویٹر ہینڈل پر کہا گیا کہ نندی گرام میں ووٹوں کی گنتی جاری ہے ۔ بتادیں کہ ادھیکاری گزشتہ سال نومبر میں ترنمول کانگریس سے الگ ہوکر بی جے پی میں شامل ہوئے تھے ۔
بتادیں کہ اس سے پہلے نیوز ایجنسی اے این آئی نے ممتا بنرجی کی جیت کی خبر دی تھی ۔ نندی گرام میں پہلے ہار قبول کرنے کے بعد اب وزیر اعلیٰ نے عدالت جانے کا اعلان کیا ہے ۔ نیوز ایجنسی اے این آئی کے مطابق بنرجی نے کہا کہ میں مینڈیٹ کو قبول کرتی ہوں، لیکن میں عدالت جاؤں گی کیونکہ مجھے جانکاری ہے کہ نتیجہ کے اعلان کے بعد کچھ ہیراپھیری کی گئی اور میں اس کا انکشاف کرؤں گی ۔