نوی ممبئی۔: آلٹ نیوز کے شریک بانی محمد زبیر نے ٹوئٹر پر ’آپ انڈیا‘ کی ایڈیٹر ان چیف نوپور جے شرما کو ٹیگ کرکے لکھا کہ نوی ممبئی پولس نے پی ایف آئی اسٹیکر معاملے میں نیلنگن سوسائٹی کے سکریٹری ایکناتھ کیوالے کو گرفتار کرلیا ہے۔ بتادیں کہ آپ انڈیا نے ہی پہلے یہ خبر نشر کی تھی کہ ’’گھروں پر چپکے ملے پی ایف آئی زندہ باد کے ساتھ ساتھ ۷۸۶ کے پوسٹر، پولس نے شروع کی جانچ، نوی ممبئی میں ممنوعہ تنظیم کی حمایت، پٹاخے بھی باندھ دئیے‘۔ زبیر نے انڈین ایکسپریس کے حوالے سے لکھا کہ نوی ممبئی پولس نے ۶۷ سالہ ایکناتھ کیوالے کو اس معاملے میں گرفتار کرلیا ہے۔ کیوالے نے نے اعتراف کیا کہ مسلم فیملی کو پھنسانے کےلیے یہ اسٹیکر لگایا تھا۔ کیوالے کا مسلم خاندان سے تنازعہ چل رہا تھا۔ اس نے یہ بھی انکشاف کیا کہ اس نے ہرے اسکیچ پین سے مسیج لکھا اور علی الصبح سوسائٹی میں اسٹیکر چپکائے تھے۔ انڈین ایکسپریس کی رپورٹ کے مطابق تحقیقات کے دوران سی سی ٹی وی فوٹیج کا جب معائنہ کیاگیا تو پولس نے دیکھا کہ کیوالے بار بار بلڈنگ کی ٹیرس پر جارہا تھا، پولس نے پایا کہ ٹیرس کی پانی کی ٹنکی پر بھی پی ایف آئی زندہ باد کا اسٹیکر لگا ہوا تھا۔ واضح رہے کہ کیوالے بار بار پولس اسٹیشن جاکر پوچھتا تھا کہ انکوائری میں کیا پیش رفت ہوئی، اس نے ہاؤسنگ سوسائٹی کے چند گھرانوں پر شک وشبے کا اظہار بھی کیا تھا۔ پولس کو کیوالے کی حرکات وسکنات مشتبہ لگے تو انہوں نے اس کی چھان بین شروع کردی، اور یہ واضح ہوگیا کہ اس شرارت کےلیے کیوالے ہی ذمہ دار ہے اور پھر اسے انکوائری کےلیے پولس اسٹیشن بلایاگیا اور اس کے سامنے شواہد رکھے گئے اور اس سے سختی سے پوچھ تاچھ کی گئی تو اس نے اپنی شرارت قبول کرلی۔ بلڈنگ کے ایک مکین کو ۷۸۶ لکھا ہوا اسٹیکر اور دو پٹاخے بھی اپنے دروازوں پر ملے تھے۔ اور اس نے پولس سے رابطہ کیا تھا۔ بتادیں کہ ہائوسنگ سوسائٹی کے مکینوں کی اکثریت ہندو ہے، اور ایک ہندو نے اپنا فلیٹ ایک مسلمان کو کرائے دیا ہے ، کیوالے انہیں پھنسانا چاہتا تھا۔ جب پولس کی جانب سے تحقیقات کی گئی اور سی سی ٹی وی فوٹیج دیکھے گئے تو مسلم خاندان کو پھنسانے کا پردہ فاش ہوا اور ایکناتھ کیوالے کو گرفتار کرلیاگیا۔ واضح رہے کہ سال ستمبر ۲۰۲۲ میں مرکزی حکومت نے پی ایف آئی اور اس سے وابستہ کئی لوگوں پر سخت غیر قانونی سرگرمیوں کی روک تھام کے قانون (یو اے پی اے) کے تحت پانچ سال کے لیے پابندی عائد کر دی تھی۔