لکھنؤ :(ایجنسی)
اس بار اتر پردیش اسمبلی انتخابات میں حیدرآباد کے ممبر پارلیمنٹ اسد الدین اویسی کی پارٹی آل انڈیا مجلس اتحاد المسلمین (اے آئی ایم آئی ایم) بھی قسمت آزما رہی ہے۔ اویسی نے یوپی انتخابات کے لیے 8 امیدواروں کی دوسری فہرست جاری کی ہے۔
حیدرآباد میں اے آئی ایم آئی ایم کے سربراہ اسد الدین اویسی نے کہا کہ ہم نے آنے والے یوپی اسمبلی انتخابات کے لیے 100 سیٹوں پر مقابلہ کرنے کی تیاری کر لی ہے۔ امیدواروں کی دو فہرستیں جاری کر دی گئی ہیں۔ دیگر مراحل کے لیے مزید امیدواروں کا اعلان کیا جائے گا۔ اویسی نے کہا کہ ہم نے الیکشن کمیشن کی ہدایات کے مطابق ورچوئل ریلیوں کے انعقاد کے انتظامات کیے ہیں۔
دوسری فہرست میں شامل امیدوار
اے آئی ایم آئی ایم کی طرف سے جاری کردہ دوسری فہرست میں پنڈت منموہن جھا (صاحب آباد، غازی آباد)، انتظار انصاری (مظفر نگر صدر)، طاہر انصاری (چرتھوال مظفر نگر)، طالب صدیقی (بھوجپور، فرخ آباد)، صادق علی (جھانسی صدر)، شیر افغان (رودولی،ایودھیا)، توفیق پردھان (بیتھری چین پور، بریلی)، ڈاکٹر عبدالمنان (اتھرولی، بلرام پور) کو امیدوار بنایا گیا ہے۔ اویسی نے پہلی فہرست میں صرف مسلم امیدواروں کو میدان میں اتارا ہے جبکہ اس دوسری فہرست میں 7 مسلم امیدواروں کو موقع دیا گیا ہے۔
بتا دیں کہ اس سے قبل آل انڈیا مسلم پرسنل لا بورڈ کے رکن مولانا سجاد نعمانی کی جانب سے اسد الدین اویسی کو خط لکھا گیا تھا۔ خلیل الرحمان سجاد نعمانی کی جانب سے اسد الدین اویسی کو لکھے گئے خط میں کہا گیا ہے کہ اویسی صرف ان سیٹوں پر امیدوار کھڑے کریں جہاں جیت یقینی ہو۔