پاکستان کرکٹ بورڈ شعیب اختر کو اہم ذمہ داری دے گا!

پاکستان کرکٹ بورڈ نے کرکٹ کی بہتری کے لیے سابق فاسٹ بولر شعیب اختر کی خدمات لینے پر غور شروع کردیا۔ایک نجی ٹی وی کی رپورٹ کے مطابق پی سی بی مینجمنٹ کمیٹی شاہد آفریدی کے بعد اب راولپنڈی ایکسیرپس شعیب اختر کی صلاحیتوں سے بھی استفادہ کرنے پر غور کررہی ہے، انہیں آنے والے دنوں میں اہم ذمے داری سونپی جاسکتی ہے۔
ذرائع کے مطابق پی سی بی حکام کی جانب سے شعیب اختر سے باقاعدہ طورپر رابطہ بھی کیا گیا ہے تاکہ ان کی رضامندی معلوم کی جاسکے۔سابق فاسٹ بولر ملکی کرکٹ کی بہتری کے لیے بورڈ حکام کے ساتھ کام کرنے کے لیے گرین سگنل بھی دے چکے ہیں۔
اطلاعات کے مطابق جلد لاہور میں پی سی بی مینجمنٹ کمیٹی کے سربراہ نجم سیٹھی سے شعیب اختر کی ملاقات بھی متوقع ہے جس میں انہیں نئی ذمے داریوں کی پیشکس کی جاسکتی ہے۔ذرائع کا کہنا ہے کہ راولپنڈی ایکسپریس شعیب اختر پالیسی سازی میں پی سی بی کی معاونت میں زیادہ دلچسپی رکھتے ہیں۔
کرکٹ کو خیر باد کہنے کے بعد راولپنڈی ایکسپریس ہمیشہ پاکستانی ٹیم کی کارکردگی میں بہترین لانے کی تجاویز دینے کے ساتھ ملکی کرکٹ کو درست سمت میں گامزن کرنے کی آواز بلند کرتے رہے ہیں۔