لکھنؤ:مرکزی وزیر دفاع راج ناتھ سنگھ نے یکساں سول کوڈ کو لے کر بڑا بیان دیا ہے۔ وزیر دفاع نے کہا کہ ملک میں یکساں سول کوڈ کے نفاذ کی تیاریاں جاری ہیں۔ مودی حکومت اس کے لیے کام کر رہی ہے۔ 2024 کے لوک سبھا انتخابات سے پہلے یہ ملک کے سب سے بڑے مسئلے پر کسی بھی ذمہ دار بی جے پی لیڈر کا سب سے بڑا بیان مانا جا رہا ہے۔
دراصل وزیر دفاع راج ناتھ سنگھ جمعرات کو اپنے پارلیمانی حلقہ لکھنؤ میں تھے۔ یوپی کی راجدھانی میں مہاراجہ ہریش چندر کے یوم پیدائش پر منعقد پروگرام سے خطاب کرتے ہوئے انہوں نے یکساں سول کوڈ پر بیان دے کر ملک میں ایک نئی بحث شروع کر دی ہے۔ وزیر دفاع نے کہا کہ مودی حکومت اپنے منشور میں کئے گئے وعدوں کو پورا کرنے کے لئے کام کر رہی ہے اور یکساں سول کوڈ پر بھی کام جاری ہے۔
‘ایشیا نیٹ نیوز ہندی’ کے مطابق راج ناتھ سنگھ نے کہا کہ ہم جو بھی وعدہ کرتے ہیں اسے پورا کرتے ہیں۔ ملک کے لوگ بی جے پی پر بھروسہ کرتے ہیں کیونکہ ہم جو کہتے ہیں وہ کرتے ہیں۔ جو بھی وعدہ کیا ہے اسے ہر حال میں پورا کیا جائے گا۔
بھارتیہ جنتا پارٹی کا ایجنڈا یکساں سول کوڈ کو نافذ کرنا ہے۔ ماضی میں گجرات،اتراکھنڈ اور ہماچل پردیش میں اس کے لیے کمیٹیاں بنائی گئی ہیں۔ جبکہ بی جے پی کی حکومت والی ریاست کرناٹک بھی یو سی سی کو نافذ کرنے کا منصوبہ بنا رہی ہے۔