لکھنؤ:
اتر پردیش کے وزیر اعلیٰ یوگی آدتیہ ناتھ نے گزشتہ روز کووڈ-19 کے انتظامات اور اس سے متعلق دیگر کاموں کے لئے’ ‘ٹیم -9’‘ تشکیل دی ہے جو پرانی کور ٹیم ’ٹیم -11’ ‘کی جگہ لے گی۔ ایک سینئر افسر نے یہ اطلاع دی۔
ایڈیشنل چیف سکریٹری انفارمیشن نونیت سہگل نے کہا کہ وزیر اعلیٰ یوگی آدتیہ ناتھ نے کووڈ 19 اور دیگر کاموں کے موثر کنٹرول کے لئے ’ٹیم -9’‘ تشکیل دی ہے۔ یہ ٹیم براہ راست وزیر اعلیٰ کو رپورٹ کرے گی اور مختلف شعبوں میں آسانی سے اہم کام انجام دے گی۔
گزشتہ سال کورونا وبا کے دوران وزیر اعلیٰ نے ’ٹیم -11 ‘تشکیل دی تھی، جس میں مختلف محکموں کے افسران تھے۔ ان کے ساتھ وزیراعلیٰ روزانہ میٹنگ کرکے کووڈ-19 کا جائزہ لیتے اور ضروری ہدایات دیتے تھے۔
وزیر اعلیٰ نے جمعہ کی جائزہ میٹنگ میں کہا کہ کووڈ کی اب تک لڑائی میں ہماری ٹیم 11-نے بہت عمدہ کارکردگی کا مظاہرہ کیا ہے۔ ’ٹیم ورک‘ کا ہی نتیجہ ہے کہ کووڈ 19-کی گزشتہ لہر میں اترپردیش محفوظ رہا۔
یوگی نے کہاکہ بدلتے ہوئے حالات کے پیش نظر ایک نئی ’ٹیم 9-‘ تشکیل دی گئی ہے جو ریاستی سطح پر کووڈ مینجمنٹ سے متعلقہ کاموں کودیکھے گی ، پالیسی کے تحت فیصلے لے گی اور اس پر عمل درآمد کرائے گی۔ ٹیم 11 کی طرح یہ ’ٹیم -9 ‘براہ راست وزیر اعلیٰ کو رپورٹ کرے گی۔ تباہی کی اس گھڑی میں ہم سب عوامی مفاد میں اپنی بہترین شراکت کو یقینی بنائیں گے۔
کون کون ہیں ٹیم میں
نو تشکیل شدہ ’ٹیم -9’‘ میں میڈیکل ایجوکیشن منسٹری کی ٹیم کے ذریعہ کووڈ 19-مریضوں کی لیے اسپتالوں میں بستر، انسانی وسائل کی فراہمی، ٹریننگ اور ویکسینیشن سے متعلق کام کرے گی۔ اس میں ایڈیشنل چیف سکریٹری صحت اور پرنسپل سیکرٹری میڈیکل ایجوکیشن بھی شامل ہوں گے۔
وزیر مملکت برائے صحت اور ایڈیشنل چیف سکریٹری صحت سمیت میڈیکل کٹ ، کووڈ- 19 کے نمونے کی جانچ اور طبی سہولیات کو بڑھانے سے متعلق کام کے لئے وزیر صحت کی ٹیم جوابدہ ہوگی۔
ٹیم -9 میں تیسرے ممبر کی حیثیت سے چیف سکریٹری ہوں گے جو حکومت ہند کے ساتھ ہم آہنگی سے متعلقہ کاموں ؍ خط و کتابت وغیرہ کو دیکھیں گے ، نیز نگرانی بھی ان کی ذمہ داری ہوگی۔
اس ٹیم کا چوتھا ممبر ایڈیشنل چیف سکریٹری ہوم ہوگا جو ریاست میں آکسیجن اور ٹرانسپورٹ کی آسانی سے فراہمی کو یقینی بنانے سے متعلق کام کرے گا۔
ٹیم 9 کے پانچویں ممبر کی حیثیت سے پولیس کے ڈائریکٹر جنرل کو یہ ذمہ داری دی گئی ہے ، جس کی قیادت میں ممنوعہ علاقے ، امن و امان ، ہفتہ وار لاک ڈاؤن اور کووڈ- 19 پروٹوکول پر عمل پیرا کرایا جائے گا۔
چھٹا ممبر دیہی ترقی اور پنچایت راج کا ایڈیشنل چیف سکریٹری ہوگا جن کی ٹیم صفائی، فوگنگ ، سینیٹائزیشن اور مانیٹرنگ کمیٹیوں کی نگرانی کرے گی۔
ٹیم کے ساتویں ممبر کی حیثیت سے کمشنر زرعی پیداوار کی ذمہ داری گنے ، اناج کی تقسیم ، جانوروں اور زراعت سے متعلقہ کاموں کے باآسانی نفاذ کی ذمہ داری عائد ہوگی جبکہ ٹیم میں آٹھویں ممبر انڈسٹریل اینڈ انفراسٹرکچر ڈیولپمنٹ (آئی آئی ڈی سی) ہوں گے ، وہ ریاست میں صنعتی سرگرمیوں میں آسانی بنانے کے لیے ذمہ دارہوں گے اور صنعتی اکائیوں کے ساتھ براہ راست رابطے کریں گے۔
ایڈیشنل چیف سکریٹری ریونیو کو ٹیم کے نویں ممبر کے طور پر شامل کیا گیا ہے ، جو تارکین وطنمزدوروں سے متعلقہ انتظامیہ کی ذمہ داری سنبھالیں گے۔
ایڈیشنل چیف سکریٹری انفارمیشن کو ٹیم 9 کے ساتھ ہم آہنگی بنانے کی ذمہ داری دی گئی ہے۔