نئی دہلی :(ایجنسی)
دہلی کی کڑ کڑ ڈوما عدالت نے جمعرات کو ملک کی راجدھانی دہلی کے شمال مشرقی علاقوں میں فروری 2020 میں فسادات کے معاملے میں مجرم قرار دیے گئے پہلے شخص کو پانچ سال قید کی سزا سنائی۔
اس شخص کا نام دنیش یادو ہے۔ دنیش یادوکی وکیل شیکھا گرگ نے بی بی سی کو بتایا، ‘دنیش یادیو کو 12000 روپے جرمانہ بھی ادا کرنا پڑے گا۔
دنیش یادو کو گزشتہ ماہ فسادات میں اس کی سرگرم شمولیت اور منوری نامی خاتون کے گھر کو لوٹنے اور جلانے میں ملوث ہونے کے جرم میں قصور وار ٹھہرایا گیا تھا۔
لائیو لاء کے مطابق دنیش یادو کو تعزیرات ہند کی دفعہ 143، 147، 148، 457، 392، 436 اور 149 کے تحت سزا سنائی گئی ہے۔
واضح رہے کہ دہلی کے شمال مشرقی علاقے میں 23 فروری سے 26 فروری 2020 کے درمیان ہونے والے فسادات میں 53 افراد ہلاک ہو گئے تھے۔ گزشتہ سال 13 جولائی کو ہائی کورٹ میں داخل کیے گئے دہلی پولیس کے حلف نامے کے مطابق ہلاک ہونے والوں میں 40 مسلمان اور 13 ہندو تھے۔