بریلی:(ایجنسی)
ہری دوار میں نام نہاد سادھوں سنتوں کی دھرم سنسد کے بعد بریلی میں ’مسلم دھرم سنسد‘ کے پروگرام کو لے کر پولیس انتظامیہ الرٹ ہے۔اتحاد ملت کے سربراہ نبیرہ اعلیٰ حضرت ؒ مولانا توقیر رضا خاں کی طرف سے پروگرام کی اجازت کےلیے خط انتظامیہ کو سونپا گیا ہے۔ اجمیر درگاہ کے خواجہ غریب نواز ؒسے بھی اس پروگرام کو حمایت ملی ہے۔ جمعہ کی نماز کا اعلان ایک بجے کیاگیا ہے اور بازار بند رکھنے کی اپیل کی گئی ہے۔
ہری دوار میں مسلمانوں کے قتل عام کے حلف کے بعد مولانا توقیر رضا خان نے بریلی میں ’مسلم دھرم سنسد‘ بلانے کا اعلان کیا ہے۔ یہ دھرم سنسد کل بروز جمعہ 7 جنوری کو اسلامیہ میدان میں ہوگا۔ جس میں لوگوں سے جمع ہونے کی اپیل کی گئی ہے۔
بدھ کو اس پروگرام کے رد ہونے کی افواہ بھی سوشل میڈیا پر وائرل ہوئی تھی۔ مولانا توقیر رضا خان کے حامیوں نے اسے افواہ قرار دیتے ہوئے کہا تھا کہ پروگرام اپنے معینہ وقت پر ہی ہوگا۔ سٹی مجسٹریٹ راجیو پانڈے کا کہنا ہے کہ مولانا توقیر رضا خان نے اسلامیہ کالج گرائونڈ میں ہی 7 جنوری کو کچھ لوگوں کو جمع ہونے کی اطلاع دی ہے۔
پروگرام کی اجازت نہیں طلب کی ہے۔ میں نے توقیر رضا خان کا خط کوتوالی پولیس کو بھیج دیا ہے۔ادھر مولانا توقیر رضا خان نے کہا کہ دھرم سنسد میں 20 لاکھ مسلمانوں کے قتل کی بات کی گئی ہے ہم حکومت کو مطلع کرتے ہیں کہ 20ہزار مسلمان بریلی کے اسلامیہ میدان جمع ہورہے ہیں۔دھرم سنسد والے ان کو مارنے کےلیے آسکتے ہیں۔ مسلمان اپنی جانوں کا نذرانہ پیش کرکے ملک میں امن اور ہم آہنگی کی راہ ہموار کریں گے۔
مولانا توقیر رضا خان کو آل انڈیا تنظیم الاسلام کی حمایت بھی حاصل ہے۔ تنظیم کے روح رواں مجاہد حسین قادری جنہوں نے متحدہ ہندوستان کی حمایت کی ہے جیسا کہ قرون وسطی میں تھا کہا ہے کہ دھرم سنسد والے ہندوئوں اور مسلمانوں کے درمیان افتراق پیدا کرناچاہتے ہیں وہ اس میں کامیاب نہیں ہوں گے۔
اس سے قبل منگل کو مولانا توقیر رضا خان نے کہا کہ ملک میں امن کی خاطر ہم آئینی طو رپر اسلامیہ گرائونڈ میں جمع ہوں گے، اسلامیہ گرائونڈ میں آنے والوں کو سخت ہدایت دیتے ہوئے کہاکہ خاموشی کے ساتھ بنا کسی نعرے اور شور شرابے کے درود شریف کا ورد کرتے ہوئے گرائونڈ پہنچے۔ بیچ سڑک پر نہ چلیں، اور بیمار، بزرگ، خواتین کو پہلے راستہ دیں۔وہیں اتحاد ملت کے ذمہ داروں نے مسلک سے اوپر اُٹھ کر مسلمانوں سے اسلامیہ گرائونڈ پہنچنے کی درخواست کی ہے۔
واضح رہے کہ کچھ دنوں قبل مولانا توقیر رضا خان نے کہا تھا کہ کچھ فرقہ پرست لوگ ملک میں فرقہ وارانہ فساد کراناچاہتے ہیں ۔ ہری دوار دھرم سنسد میں مسلمانوں کے خلاف جو تبصرے کیے گئے وہ شرمناک ہیں، جس کی وجہ سے قوم غصے میں ہے اس کا جواب دینے کےلیے اتحاد ملت کانفرنس کی طرف سے 7 جنوری کو اسلامیہ میدان میں مسلم دھرم سنسد منعقد کیاجائے گا، جس میں بڑی تعداد میں قوم کے افراد شریک ہوں گے۔ انہوں نے کہا تھا کہ مسلمانوں کے خلاف متنازعہ تبصرے برداشت نہیں کیے جائیں گے۔
انہوں نے یہ بھی کہا تھا کہ 7جنوری کو اسلامیہ میدان میں مسلم علماء کے ساتھ بڑی تعداد میں (20ہزار کے قریب) مسلمان قربانی کے لیے جمع ہوں گے۔ انہوں نے کہاتھا کہ مسلمان تو پیدا ہوتے ہی ہیں قربانی دینے کےلیے ، دیکھیں یہ طاقت کتنی قربانی لے گی، مسلمانوں کی۔ان کا اپنا ایک مقصد ہے اس کو کبھی ہم کامیاب نہیں ہونے دیں گے۔ انہوں نے کہاتھاکہ ۷؍جنوری کو جمعہ کے دن بڑی تعداد میں مسلمان قربانی کےلیے ہاتھ باندھے پرامن طریقے سے ا سلامیہ میدان میں جمع ہوں گے، اس کے لیے ان کی قربانی پولس لے یا پھر فرقہ پرست طاقتیں اسی دن مسلم دھرم سنسد میں یہ فیصلہ لیاجائے گا۔ وہ لوگ قربانی چاہتے ہیں تو مسلمان قربانی دینے کو تیار ہیں۔