وارانسی :(ایجنسی)
وارانسی میں ٹریننگ کے لیے جا رہی ای وی ایم سے بھری گاڑی کو پکڑنے کے بعد ہنگامہ آرائی کے سلسلے میں انتظامیہ نے تین سو نامعلوم افراد کے خلاف اقدام قتل سمیت کئی دفعات کے تحت مقدمہ درج کیا ہے۔
اے ڈی جی زون رام کمار کی گاڑی پر پتھراؤ ہوا تھا۔ ان کا ڈرائیور للتا پرساد زخمی ہوگیا تھا۔ ڈرائیور کی شکایت پر لال پور پانڈے پور پولیس نے اقدام قتل ، ڈکیتی، ہنگامہ، سرکاری کام میں رکاوٹ سمیت 16 سنگین دفعات کے تحت مقدمہ درج کیا ہے۔ ویڈیوز اور تصاویر کے ذریعے نامعلوم شرپسندوں کی نشاندہی کرکے کارروائی کی جائے گی۔
پہاڑیہ منڈی میں گنتی کے مقام پر رکھی گئی ای وی ایم میں دھاندلی کا الزام لگاتے ہوئے منگل کی شام سیکڑوں لوگوں نے ہنگامہ کیا تھا۔ وہ منڈی کے مین گیٹ سمیت احاطے میں دھرنے پر بیٹھ گئے۔ دو بار بیریکیڈ کو توڑ کر اسٹرانگ روم میں داخل ہونے کی کوشش میں سیکورٹی فورسز کے ساتھ ان کی جھڑپ ہوئی۔ اس کے بعد انتظامیہ مخالف نعروں کے درمیان منڈی کے سامنے پانڈے پور-پہاڑیے روڈکو بلاک کر دیا گیا۔
واقعہ کے بعد ڈویژنل کمشنر دیپک اگروال، ضلع الیکشن افسر کوشل راج شرما، پولیس کمشنر اے ستیش گنیش اور اے ڈی جی زون رام کمار موقع پر پہنچ گئے۔ اے ڈی جی زون کی گاڑی جیسے ہی منڈی گیٹ کے اندر پہنچی اسے گیٹ نمبر دو کے قریب روک دیا گیا اور پیچھے سے پتھراؤ شروع ہو گیا۔
اس واقعہ میں اے ڈی جی زون رام کمار کو کوئی چوٹ نہیں آئی لیکن ڈرائیور للتا پرساد یادو کے کان اور جبڑے میں شدید چوٹیں آئیں۔ وہ بے ہوش ہو گیا۔ بندوق بردار شیام دلارے سنگھ بھی زخمی ہوگئے۔
پتھراؤ سے اے ڈی جی زون کی گاڑی کے شیشے ٹوٹ گئے۔ شیشے کے ساتھ ساتھ سائیڈ مرر، فلیگ لائن، بمپر اور دروازے کے شیشے کو بھی نقصان پہنچا۔ کچھ لوگ گاڑی کے اوپر لگے وائرلیس اینٹینا کو توڑ کر فرار ہو گئے۔ اس دوران نعرے بازی اور گالی گلوچ کا سلسلہ جاری رہا۔
پولیس نامعلوم افراد کے خلاف ہنگامہ آرائی، دھمکیاں، حملہ، سرکاری کام میں رکاوٹ، سرکاری املاک کو نقصان پہنچانے، سرکاری املاک کو نقصان پہنچانے، قتل کی کوشش، ڈکیتی سمیت 16 دفعات کے تحت مقدمہ درج کرکے ملزمان کی نشاندہی کر رہی ہے۔