نئی دہلی: (پریس ریلیز)
دہلی کی معروف سماجی تنظیم الحکمہ فائونڈیشن کے ذریعہ مرتب کردہ ایک بہت ہی اہم کتابــــ یوتھ پاور ان انڈیا : اپارچنیٹی اینڈچیلنجز (Youth Power in India: Opportunities and Challenges)کا اجراء پشوپتی کمار پارس ، مرکزی وزیر برائے فوڈ پرسیسنگ انڈسٹریز، گورنمنٹ آف انڈیا ، نئی دہلی کے ہاتھوں عمل میں آیا۔ اس کتاب میں مختلف یونیورسٹیز سے وابستہ پروفیسرز، محققین اور سماجی زندگی سے جڑے20 دانشوروںکے مقالے شامل ہیں ۔ کتاب کے بارے میں کتاب کے ایڈیٹر ڈاکٹر دلپ کمارسینئرایگزیکٹیو، پروجیکٹ، این سی اے ای آراور الحکمہ فائونڈیشن کے ایگزیکٹیو ممبر نے بتایا کہ اس کتاب میں ملک کی اقتصادی ترقی کی موجود ہ صورت حال، ترقی میں حائل مشکلات اور ان کا حل بھی پیش کیا گیا ہے نیز نوجوانوں کے مسائل کو جیسے بے روزگاری، نشہ خوری، جرائم ، آرام طلبی اور خواتین کے استحصال وغیرہ کی طرف بڑھتے ہوئے رجحانات کی طرف گورنمنٹ اور دوسرے اداروں کی طرف سے شائع رپورٹس اور اعدادو شمار کی روشنی میںجائزہ اورمستقبل کا منظر نامہ پیش کرنے کی کوشش کی گئی ہے۔
اس موقع پر ڈاکٹر ضیاء الدین احمد، چیئرمین، الحکمہ فائونڈیشن نے فائونڈیشن کے بارے میں جانکاری دی اور بتایا کہ فائونڈیشن تعلیم، صحت، اخلاقی قدروں، قیام امن اور عام فلاح و بہبود کے لئے 1990سے لگا تار سرگرم عمل ہے۔
کتاب کا اجراء کرتے ہوئے مرکزی وزیرپشوپتی کمارپارس نے کہا کہ مجھے خوشی ہے کہ فائونڈیشن نے ایک بہت اہم موضوع پر کتاب لاکر نوجوانوں کے متعدد مسائل اور ان کے حل پر روشنی ڈالی ہے۔ انھوں نے اپنی وزارت فوڈ پروسیسنگ کی بہت سی اسکیموں کا ذکر کرتے ہوئے کہا کہ میری وزارت ملک میں بے روزگاری دور کرنے کے لئے بہت سے پروجیکٹ چلا رہی ہے انھوں نے امید ظاہر کی کہ جلد ہی ملک کا وکاس نئی اونچائیاں چھوئے گا اور بے روزگاری کا مسئلہ حل ہوگا۔
اس موقع پر اس کتاب کے دوسرے ایڈیٹرسید شعیب احمد بھی موجود تھے۔ان کے علاوہ پروفیسر اے کے جھا، ڈاکٹر کیلاش مشرا اور ڈاکٹر ارون دتی نے بھی اس پروگرام میں شرکت کی۔ اس موقع پر فائونڈیشن کے سکرٹری ثاقب یاسین نے وزیر محترم کا شکریہ ادا کیا۔ اس موقع پر فائونڈیشن کی جانب سے مرکزی وزیر کو شال اور ایک نشان یادگار بھی پیش کیا گیا۔