رام پور (آر کے بیورو)
جمعہ کو ایم پی ایم ایل اے کورٹ (سیشن ٹرائل) میں یتیم خانہ کیس میں ایس پی کے قدر آور لیڈر اعظم خاں سے متعلق دو معاملات میں سماعت ہوئی، جس میں اعظم خاں سمیت چار ملزمان کے خلاف دو مقدمات میں فرد جرم عائد کی گئی ہے۔ معاملے کی اگلی سماعت 26 مارچ کو ہوگی۔
سال 2019 میں شہر کوتوالی میں ایس پی لیڈر اعظم خاں، ایس پی ضلع صدر وریندر گوئل، اسلام ٹھیکہ دار، ریٹائرڈ سی او آل حسن کے خلاف رپورٹ درج کی گئی تھی۔ جس میں ملزمان پر ایک رائے ہوکر ڈکیتی ، چھیڑ خانی، ڈرانے دھمکانے وغیرہ کے الزامات تھے۔ یتیم خانہ کیس سے متعلق ان الزامات کے دو مقدمات میں جمعہ کو عدالت میں سماعت ہوئی۔
جس میں عدالت نے پہلے ہی دفاعی وکیل کی جانب سے دائر کی گئی ڈسچارج درخواست کو مسترد کر دیا تھا۔ جمعہ کو کارروائی کو آگے بڑھاتے ہوئے، عدالت نے ان دو معاملات میں الزامات طے کیے ہیں۔ تاہم ان مقدمات میں اعظم خاں سمیت تمام ملزمان کی ضمانت پہلے ہی منظور ہو چکی ہے۔
جمعہ کو عدالت میں تمام ملزمان پر ایک رائے ہوکر ڈکیتی، چھیڑ چھاڑ، دھمکیاں دینے، نقصان پہنچانے، مجرمانہ سازش کے الزامات عائد کیے گئے ہیں۔ ایس پی لیڈر اعظم خاں نے ویڈیو کانفرنسنگ کے ذریعے سیتا پور جیلسے شرکت کی۔ عدالت کی طرف سے انہیں اپنے خلاف الزامات سے آگاہ کیا گیا۔ حکومتی وکیل ارون پرکاش سکسینہ نے کہا کہ اعظم خاں سمیت چار ملزمان کے خلاف الزامات عائد کیے گئے ہیں۔ اب اس معاملے کی اگلی سماعت 26 مارچ کو ہوگی۔