رامپور (آر کے بیورو)
لوک سبھا انتخابات کے دوران اشتعال انگیز تقریر کرنے کے الزام میں درج مقدمہ میں ویڈیو آبزرویشن ٹیم کے انچارج اےڈی او نے چار مارچ کو کورٹ میں اپنے بیان درج کرائے تھے۔ جس پر پیر کو گواہ سے جرح ہونی تھی، لیکن وکیل دفاع کی جانب سے عدالت میں جرح کے لئے کوئی حاضر نہیں ہوا۔اس پر عدالت نے سماعت کرتے ہوئے جرح کا وقت ختم کر دیا ہے ۔ اب اس معاملہ کی سماعت 7 مئی کو ہوگی۔
سال 2019 میں، ایس پی لیڈر اعظم خاں اتحاد کے لوک سبھا امیدوار تھے۔ اس پر 7 اپریل 2019 کو ملک کوتوالی علاقے کے ناگریہ گاؤں میں مہم کے دوران دو طبقوں کے درمیان دشمنی پیدا کرنے کے مقصد سے اشتعال انگیز تقریریں کرنے کا الزام ہے۔ جس کی ویڈیو وائرل ہوگئی۔ جس پر ملک اسمبلی حلقہ کے ویڈیو آبزرویشن ٹیم کے انچارج انل کمار چوہان نے 9 اپریل کو ملک پولیس اسٹیشن میں مقدمہ درج کرایا تھا۔ تفتیش کے بعد پولیس نے عدالت میں چارج شیٹ داخل کی۔ اس معاملے میں ایس پی لیڈر اعظم خاں کی ضمانت عدالت نے منظور کر لی ہے اور 12 نومبر 2021 کو عدالت نے ان کے خلاف الزامات طے کیے تھے۔
پیر کو اس معاملے کی سماعت ایم پی-ایم ایل اے کورٹ مجسٹریٹ ٹرائل میں ہوئی۔ اس دوران گواہ انل کمار چوہان گواہی کے لیے پیش ہوئے تاہم دفاع کی جانب سے کوئی بھی عدالت میں پیش نہیں ہوا۔ جس پر سماعت کرتے ہوئے عدالت نے جرح کا وقت ختم کرتے ہوئے سماعت کے لیے 7 مئی کی تاریخ مقرر کی ہے۔