نئی دہلی:(ایجنسی)
بھوجپوری گلوکارہ اور سوشل میڈیا سنسنی نیہا سنگھ راٹھور کی ایک نئی ویڈیو وائرل ہٹ ہونے کے ساتھ ان کی بی جے پی ممبر پارلیمنٹ اوربھوجپوری اداکار روی کشن کے ساتھ سانگ وار چھڑ گئی ہے۔ موجودہ سماجی ، سیاسی مسائل پر مزاحیہ طنز کے لیے مشہور نیہا نے اس بار یوگی آدتیہ ناتھ سرکارپر نشانہ سادھاہے۔
راٹھور نے اتوار کو اپنے مقبول یوٹیوب چینل پر اپنے نئے گانے ’یوپی میں کا با‘ کی ویڈیو اپ لوڈ کیا۔
اس میں انہوں نے وبا کی دوسری لہر کے دوران کووڈ سے ہونے والی اموات، ہاتھرس’ عصمت دری اور قتل کیس‘، مرکزی وزیر اجے کمار مشرا کے بیٹے کے قافلے کے ذریعہ لکھیم پور کھیری میں کسانوں کو مبینہ طور پر کچلنے کے واقعہ کے ساتھ ساتھ دیگر تمام مسائل پر یوپی سرکار کی تنقید کی ہے۔
بھوجپوری اداکار اور بھگوا پارٹی کے رہنما نے اپنےگیت ’یو پی میں سب با‘ میں اپنا تعارف ’روی کشن شکلا‘ کے طور پر پیش کیا ہے اور بھوجپوری ووٹروں کو راغب کرنے کے لیے آدتیہ ناتھ حکومت کی کامیابیوں کو شمار کرایا ہے۔
روی کشن کا گانا کچھ یوں ہے، ’یوگی کی سرکار با، وکاس کے بہار با، سڑک کے جال با، کام بے مثال با، اپرادھی کے جیل با، بجلی ریلام ریل با، کورونا گیئل ہار با، یوپی میں سب با۔‘
ان دعوؤں پر پلٹ وار کرتے ہوئے راٹھور نے گایا ہے، ’’کورونا سے لکھن مر گیئل لے، لاشن سے گنگا بھر گیئل بے، کفن نوچت ککور بلار با، اے بابا، یوپی میں کا با؟۔‘‘
انہوں نے اکتوبر 2021 کے لکھیم پور کھیری واقعے کا بھی ذکر کیا، جس میں مرکزی وزیر داخلہ اجے کمار مشرا کے بیٹے آشیش مشرا کے ایک قافلے نے مبینہ طور پر ایک مظاہرے کے دوران چار کسانوں اور دیگر کو کچل دیا تھا۔ اس واقعہ کے لیے کون ذمہ دار ہے،اس پر سوال اٹھانے کے لیے گلوکارہ نے وزیر اعظم نریندرمودی کی’ چوکیدار‘ والی شبیہ پر نشانہ سادھا۔
اس کےبول ہیں:’ ’منتری کے بیٹوا بڑارنگدار با، کسان کے چھاتی پے روندت موٹر کاربا، اے چوکیدار ، بولو کے ذمہ دار با؟‘‘