نئی دہلی : (ایجنسی)
یوپی میں مبینہ تبدیلی مذہب کیس کے معاملہ میں گرفتار کئے گئے منگل کو اترپردیش کی اینٹی انسداد دہشت گردی اسکواڈ ( اے ٹی ایس) نے دہلی کے شاہین باغ میں سرچ آپریشن چلایا۔ اے ٹی ایس کی ٹیم نے کورٹ کے حکم کے بعد یہاں تلاشی لی۔
یوپی اے ٹی ایس کی ٹیم کورٹ کے حکم پر آئے دن دہلی – این سی آر کے کئی ٹھکانوں پر چھاپہ ماری اور تلاشی مہم چلا رہی ہے ۔ اطلاع کے مطابق یوپی اے ٹی ایس کی ٹیم منگل صبح 9 بجے دہلی پہنچی تھی۔ کورٹ کے حکم پر ٹیم شاہین باغ علاقے پہنچی، یہاں کے ایف بلاک میں ٹیم نے تلاش لی۔ اس کے علاوہ کچھ او ر مقامات پر جاکر بھی سرچنگ کی۔
بتایا جا رہا ہے کہ اے ٹی ایس نے مبینہ تبدیلی مذہب کرانے کے معاملے میں گرفتار ہوئے مولانا کلیم صدیقی کی رہائش گاہ پر چھاپہ ماری کی ہے ۔ مولانا کلیم صدیقی کے دفتر پر بھی چھاپہ مارا گیا ہے ۔اے ٹی ایس نے دعویٰ کیا کہ فنڈنگ سے جڑے کچھ کاغذات برآمد ہوئے ہیں ۔
واضح رہے کہ اے ٹی ایس نے اسی سال جون میں نوئیڈا سے چلنے والے مبینہ تبدیلی مذہب ریکٹ کا پردہ فاش کیا تھا۔ اس معاملے میں اے ٹی ایس نے مولانا عمر گوتم اور مفتی قاضی جہانگیر قاسمی کو گرفتار کیا تھا ۔ یہ دونوں دہلی کے جامعہ نگر علاقے کےرہنے والے ہیں۔ اے ٹی ایس کے مطابق یہ ریکٹ ملک بھر میں پھیلاہوا ہے اور تبدیلی مذہب کا یہ پورا کھیل دو سال سے چل رہا تھا ۔
اسی معاملے میں اے ٹی ایس نے 21 ستمبر کو مولانا کلیم صدیقی کو بھی گرفتار کیا تھا۔ ان کی گرفتاری کے بعد اے ٹی ایس نے محمد ادریس، محمد سلیم اور کنال اشوک چودھری عرف عاطف کو گرفتار کیا تھا۔ ان میںمحمد ادریس اورمحمد سلیم مظفر نگر تو عاطف مہاراشٹر کے ناسک کا رہنے والا ہے ۔ ان تینوں پر مولانا کی مدد کرنے کاالزام ہے ۔