پرتاپ گڑھ :
اترپردیش کے ضلع پرتاپ گڑھ میں پولیس اور محکمہ آبکاری کی مشترکہ ٹیم نے ہاتھی گانواں کے علاقے میں مبینہ طور پر غیر قانونی شراب بنانے والی فیکٹری کا پردہ فاش کیا ، جو گئوشالہ کی آڑ میں چل رہی تھی۔ سات افراد کو وہاں سے کروڑوں روپے مالیت کی شراب اور اسے بنانے میں استعمال ہونے والے سامان کے ساتھ گرفتار کرلیا گیا ہے۔
خبر رساں ایجنسی (بھاشا) کی رپورٹ کے مطابق پریاگ راج کے علاقہ کے ایڈیشنل ڈائریکٹر جنرل پولیس (اے ڈی جی) پریم پرکاش نے بتایا کہ گئوشالہ کی آڑ میں جمعہ کی شام پولیس اور محکمہ ایکسائز کے ذریعہ پارسی پورجھجمو میں مشترکہ آپریشن کیا گیا۔ انہوں نے بتایا کہ اس عرصے کے دوران گئوشالہ میں بھوسے اور پوال میں چھپا کر رکھی گئی سیکڑوں پیٹی شراب برآمد کی گئی۔یہ شراب غیر قانونی طور پر بنائی گئی تھی۔ پرکاش نے بتایا کہ گئوشالہ میں کھدائی کے دوران بھی بھاری مقدار میں شراب اور اس کو بنانے کے لئے استعمال ہونے والا سامان بھی برآمد کرلیا گیا ہے۔ برآمد شدہ شراب کی مالیت کئی کروڑ روپے بتائی جاتی ہے۔
پرکاش نے بتایا کہ گئوشالہ اور دیگر ممکنہ ٹھکانے پر وسیع پولیس فورس کی موجودگی میں جے سی بی سے کھدائی کا کام جاری ہے۔ انہوں نے بتایا کہ گئوشالہ کی آڑ میں چلنے والی اس فیکٹری کا تعلق شراب مافیا گڈو سنگھ سے ہے ، جس کی تلاش کی جارہی ہے۔ انہوں نے بتایا کہ اس معاملے میں بہت سارے لوگوں کو حراست میں لیا گیا ہے۔
پولیس سپرنٹنڈنٹ آکاش تومر نے بتایا کہ سات ملزمان کو گرفتار کیا گیا ہے اور 20 افراد کی شناخت ہوگئی ہے۔ تومر نے بتایا کہ شراب کے غیر قانونی کاروبار میں ملوث 45 افراد کی شناخت کرلی گئی ہے اور ان کی تلاش جاری ہے۔ انہوں نے کہا کہ تمام ملزمان کی جائیداد ضبط ہوگی۔
ضلع متھرا میں ہفتے کے روز پنچایت انتخابات کے پیش نظر پولیس کے ذریعہ چلائی جانے والی ایک مہم کے دوران غیر قانونی اسلحہ بنانے کی ایک فیکٹری پکڑی گئی۔ نیوز ایجنسی بھاشا کی رپورٹ کے مطابق ایس پی (دیہی علاقوں) شیریش چندر نے کہا کہضلع میں یہ پنچایت انتخابات کے پیش نظر غیر قانونی اسلحہ ، فیکٹریوں اور غیر قانونی شراب کے اسمگلروں کے خلاف خصوصی مہم چلائی جارہی ہے۔ اس کے تحت بارسانہ تھانے کے علاقے میں راجستھان سے متصل گاؤں ہتھیہ میں غیر قانونی اسلحہ بنانے کی ایک فیکٹری پکڑی گئی ہے۔
انہوں نے بتایا کہ پولیس نے موقع سے دو افراد اسلم اور عامر کو رنگے ہاتھوں گرفتار کیا۔ ان کے قبضے سے 12 بور کی بندوق اور دو 315 بور آتشیں اسلحہ اور بہت سارے ہتھیار برآمد ہوئے ہیں۔ وہاں سے یہ ہتھیار بنانے کے لئے بڑی تعداد میں اوزار اور خام مال برآمد کیا گیا ہے۔ ایس پی نے بتایا کہ دونوں ملزمان کو عدالت میں پیش کرنے کے بعد جیل بھیج دیا گیا ہے۔